Verslunin B. Jensen lokar eftir 27 ára starfsemi – Fjölskyldurekstri lýkur með þakklæti og hlýju

Eftir 27 ár af samfelldri og traustri þjónustu við samfélagið hefur fjölskyldurekin verslun B. Jensen á Akureyri ákveðið að loka dyrum sínum fyrir síðasta sinn föstudaginn 13. júní. Þetta tilkynna þau hjónin sem staðið hafa að rekstrinum með virðingu, gleði og einlægni í gegnum árin.

Verslunin B. Jensen hefur verið þekkt fyrir úrval af gæðakjötvörum og sérvalinni matvöru, sem margir hafa sótt sérstaklega eftir.

Í tilkynningu sem fjölskyldan birti í dag á facebook þakkar hún öllum sínum viðskiptavinum og velunnurum fyrir hlýjar móttökur, traustið og vináttuna sem þeim hefur verið sýnd í gegnum árin. „Það hefur verið okkur sannur heiður að vera hluti af ykkar daglega lífi,“ segir meðal annars í tilkynningunni.

B. Jensen hefur ekki einungis verið verslun heldur samkomustaður þar sem fólk hittist, spjallaði og deildi gleðistundum. Eigendurnir lýsa því sem sönnu ævintýri að hafa fengið að njóta samvista við viðskiptavini sína, og kvöddu með orðum um þakklæti og góðar minningar: „En öll ævintýri taka víst enda, þó góð séu.“

Í tilefni lokunarinnar býður verslunin 20% afslátt af öllum vörum til þeirra sem versla á staðnum fram að lokun. Þá verður einnig tekið við netpöntunum til og með 11. júní.

Að lokum sendir starfsfólk og fjölskylda B. Jensen kærar þakkir fyrir samfylgdina og hlýjuna sem þeim hefur verið sýnd.

Mynd: facebook / B. Jensen