Veislan Goût de France haldin í fjórða sinn á Íslandi

Veislan Goût de France/Good France verður haldin í fjórða skipti miðvikudaginn 21. mars næstkomandi. Þátttakan á heimsvísu aldrei verið meiri: Vel yfir 3.000 matreiðslumenn bjóða 3.000 matseðla í fimm heimsálfum. Með þessari veislu er ætlunin að vekja athygli á franskri matgerðarlist og að bjóða fólki að neyta kvöldverðar að frönskum hætti.

Fimm veitingahús á Íslandi taka þátt í veislunni og bjóða matseðla undir hennar merkjum 21. mars og jafnvel lengur. Þetta eru AALTO Bistro (Sveinn Kjartansson), Humarhúsið / The Lobsterhouse (Ívar Þórðarson), Kitchen & Wine (Hákon Már Örvarsson), Kopar (Ylfa Helgadóttir) og Le Bistro (Rémi Orange).

Öll veitingahús, sem taka þátt í veislunni, hvar sem er í heiminum, leggja sitt af mörkum til lifandi, skapandi og leitandi matgerðarlistar og halda jafnframt í heiðri gömlu gildin: Samneyti, gleði, virðingu fyrir matarnautninni og fyrir umhverfinu.

Matstaðirnir spanna allan skalann, frá grillhúsum til stjörnustaða, og bjóða máltíðir úr ferskum afurðum, upprunnum af næstu grösum, þar sem hóflega er farið með fitu, sykur og salt.

Hádegisverðarboð hjá franska sendiherranum

Í hádegisverði hjá franska sendiherranum, í tilefni af veislunni, verða íslenskar bókmenntir í öndvegi. Friðgeir Ingi Eiríksson, sem rak Gallery Restaurant og vinnur nú að því að opna nýjan veitingastað á næstunni Brasserie Eiriksson, matbýr fyrir gesti sendiherrans franska rétti, sem innblásnir eru af bókalestri hans, og einn réttur að auki er í virðingarskyni við franska matreiðslumanninn Paul Bocuse sem lést fyrir skömmu.

Matseðlar hjá veitingastöðunum á Íslandi

Á heimasíðu Goût de France er hægt að nálgast upplýsingar um matseðla og verð.  Smellið á eftirfarandi vefslóðir:

AALTO Bistro

Humarhúsið

Kitchen & Wine

Kopar

Le Bistro