Þessi keppa um titilinn Kokkur Ársins 2019 – Aldrei fleiri konur í keppninni

Garðar Kári Garðarsson er Kokkur ársins 2018. Aðstoðarmaður Garðars í keppninni var Harpa Sigríður Óskarsdóttir.

Keppnin Kokkur ársins 2019 fer fram í Hörpu laugardaginn 23. mars næstkomandi en það er einn af hápunktunum í dagatali Íslenska matardagatalsins. Þar takast á þeir bestu af þeim bestu og keppa til úrslita um þennan eftirsótta titil.

Forkeppnin fer fram núna á miðvikudaginn 6. mars en þar keppa tíu kokkar um fimm pláss í lokakeppninni sjálfri. Þrjár konur eru skráðar til leiks í ár og er það mesti fjöldi kvenna sem skráður hefur verið í keppnina í þessa.

„Það er mikið fagnaðarefni að sjá aukningu skráðra kvenna í keppninni. Það er okkur metnaðarmál að ná hlutfalli þeirra til jafns við karla,“

Kokkalandsliðið 2018
Íslenska kokkalandsliðið með gullverðlaunin í Luxemborg í desember. Þjálfarinn Ylfa Helgadóttir lengst til hægri í fermri röð og Björn Bragi Bragason forseti Klúbbs matreiðslumeistara lengst til hægri í aftari röð.

segir Björn Bragi Bragason forseti Klúbbs matreiðslumeistara sem heldur keppnina.

„Ylfa Helgadóttir var meðal annars þjálfari Kokkalandsliðsins í Luxemborg þar sem liðið vann til gullverðlaunan sem ég held að sé okkur góð hvatning. Stéttin hefur verið mjög karllæg og öll skref í átt að meira jafnvægi eru góð skref í átt að tryggja öfluga og fjölbreytta stétt fagfólks,“

bætir Björn við.

Þeir sem keppa um titilinn í ár eru þau:

• Iðunn Sigurðardóttir, Íslenski Matarkjallarinn
• Ingimundur Elí Jóhannsson, Lux veitingar
• Kolbrún Hólm Þorleifsdóttir, Deplar Farm
• Rúnar Pierre Heriveaux, Grillið Hótel Sögu
• Sigurjón Bragi Geirsson, Garri
• Sindri Geir Guðmundsson, Jamie’s Italian
• Snædís Xyza Mae Jónsdóttir Ocampo, Hótel Saga Mímir Restaurant
• Viktor Snorrason, Moss Restaurant
• Vilhjálmur Guðmundsson, Grand Hótel
• Þorsteinn Kristinsson, Fiskfélagið

Garðar Kári er Kokkur ársins 2018
F.v. Þorsteinn Geir Kristinsson, Garðar Kári Garðarsson og Sigurjón Bragi Geirsson

Það var Garðar Kári Garðarsson sem hreppti titilinn Kokkur ársins 2018. Sigurjón Bragi Geirsson hreppti annað sætið og Þorsteinn Kristinsson varð í því þriðja.

Allir faglærðir matreiðslumenn og þar með talið sveinsprófshafar geta sótt um aðgang að keppninni og þannig slegist í hóp keppenda um titillinn Kokkur ársins 2019.

Kokkur ársins 2019 er besti kokkur landsins árið 2019 og hlýtur þátttökurétt fyrir Íslands hönd í Nordic Chef of the Year 2020. Verðlaunin eru ekki af verri endanum en í fyrstu verðlaun eru 300.000 krónur, í öðru sæti 100.000 krónur og í þriðja sæti er gjafabréf með Icelandair.

Þráinn Freyr Vigfússon, kokkur ársins 2007, er í forsvari fyrir verkefnisstjórn keppninnar í ár.
Nánari upplýsingar um keppnina má fá í tölvupósti, [email protected], eða í síma 695 2999.

Myndir: aðsendar