Soho café opnar á Ljósanótt

Örn Garðarsson

Örn Garðarsson matreiðslumeistari og eigandi veisluþjónustunnar Soho sem staðsett er í Hrannargötu 6 í Reykjanesbæ stefnir nú að opna veitingahús í sama húsnæði á Ljósanótt. Menningar-, og fjölskylduhátíðin Ljósanótt í Reykjanesbæ er haldin árlega fyrstu helgina í september.

Soho Café er nafnið á veitingastaðnum og er hönnunin virkilega vel heppnuð, gróf en um leið hlýleg. Staðurinn tekur um 35 manns í sæti.

Örn kemur til með að bjóða upp á tvo rétti dagsins í hádeginu sem verða auglýstir sérstaklega á facebook síðu staðarins og að auki verða allskyns litlir réttir í boði, t.a.m. samlokur, bakkelsi, tertur ofl. Opnunartími er enn í skoðun, en til að byrja með þá verður opið frá hádeginu og fram eftir degi og lokað á kvöldin. Örn horfir einnig á að bjóða upp á morgunmat og að sjálfsögðu að hafa líka opið á kvöldin, en þetta á allt eftir að fínpússast sagði Örn í samtali við veitingageirinn.is.

Eftirfarandi myndir tók Örn Garðarsson en hann bauð nokkrum í prufukvöldverð nú á dögunum:

Til gamans má geta að heimasíða Soho hefur fengið nýtt útlit og er hin glæsilegasta, en hægt er að skoða heimasíðuna á vefslóðinni www.soho.is.

Mynd: Smári