Snædís Xyza Mae Ocampo sæmd Cordon Bleu orðu Klúbbs matreiðslumeistara

Bjarki Ingþór Hilmarsson formaður orðunefndar, Snædís Xyza Mae Ocampo og Þórir Erlingsson forseti Klúbbs matreiðslumeistara

Á árshátíð Klúbbs matreiðslumeistara sem haldin var nýverið á hótel Geysi í Haukadal var Snædís Xyza Mae Ocampo matreiðslumeistara veitt Cordon Bleu orða Klúbbs matreiðslumeistara en orðan er veitt þeim sem sýnt hafa fram á framúrskarandi starf í þágu matreiðslufagsins.

Snædís fæddist á Filippseyjum 1989 og flutti ung til Íslands, þrátt fyrir að oft hafi á móti blásið, kemur hún alltaf út sem sannur sigurvegari.  Snædís ólst upp á Dalvík og flutti síðar til Reykjavíkur til að mennta sig í fatahönnun, en eftir að hafa kynnst matreiðslufaginu í aukavinnu á Sushi Social færði hún sig yfir í matreiðsluna.  Hóf námið á Apótekinu,  færði sig síðan á Hótel Sögu og útskrifaðist þaðan 2018. Hún starfar núna sem yfirmatreiðslumaður ION Hotel og er þjálfari Kokkalandsliðsins.

Snædís er þaulreynd í keppnismatreiðslu og hóf sín afskipti af Kokkalandsliðinu sem aðstoðarmaður 2015 og tók þátt ásamt liðinu á Ólympíuleikum 2016.  Hún var svo fyrirliði liðsins þegar það náði sínum besta árangri og varð í 3. sæti á Ólympíuleikum 2020 samhliða því sem hún gekk með sitt fyrsta barn.

Hún tók við þjálfun liðsins í apríl 2023 og leiddi liðið aftur á pall þar sem það jafnaði árangur sinn frá 2020 og náði 3. sæti.  Sem er eftirtektarverður árangur eftir skamma en snarpa 9 mánaða lotu í æfingum, en flest liðin æfðu í 2 ár fyrir mótið.

Snædís er flinkur fagmaður, okkur öllum frábær fyrirmynd, fær stjórnandi og sannur leiðtogi. Fremst á meðal jafningja!

Sjá einnig: Óskar Finnsson sæmdur Cordon Bleu

Sjá einnig: Sölvi B. Hilmarsson sæmdur Cordon Bleu

Myndir: kokkalandslidid.is