Ölgerðin eflir sig á matvælamarkaði með kaupum á Kjarnavörum

Kjarnavörur er staðsett við Miðhraun 16 í Garðabær

Ölgerðin Egill Skallagrímsson hf. hefur undirritað samkomulag um kaup á 100% hlut í Kjarnavörum hf. Kjarnavörur, stofnað árið 1989, er eitt stærsta framleiðslufyrirtæki landsins á sviði sósugerðar, sultugerðar, grauta og smjörlíkis.

Fyrirtækið er í 32,4% eigu Guðjóns Rúnarssonar, framkvæmdastjóra Kjarnavara, og 67,6% í eigu danska félagsins Dragsbæk A/S. Eftir kaupin mun Kjarnavörur starfa sem sjálfstætt félag innan samstæðu Ölgerðarinnar, með Guðjón áfram sem framkvæmdastjóra, að því er fram kemur í tilkynningu frá Ölgerðinni.

Milljarðakaup með öflugum eignum

Með í kaupunum fylgja eignarhlutir Kjarnavara í dótturfélögum, þar á meðal 100% hlutur í Ísbúð Vesturbæjar ehf., 66,67% hlutur í Nonna litla ehf. og 59% hlutur í Innbaki hf. Heildarvirði Kjarnavara er metið á 3.970 milljónir króna, og verða kaupin fjármögnuð með lántöku. Samkomulagið er háð niðurstöðu áreiðanleikakönnunar, endanlegri skjalagerð og samþykki Samkeppniseftirlitsins.

Fjórir milljarðar í árstekjur – öflug starfsemi Kjarnavara

Kjarnavörur framleiðir aðallega fyrir innanlandsmarkað, en flytur einnig vörur til Færeyja. Um 60% af veltu fyrirtækisins kemur frá eigin vörumerkjum, en 40% frá framleiðslu undir vörumerkjum þriðja aðila. Fyrirtækið hefur 35 starfsmenn og á fjórar fasteignir, samtals um 3.000 fermetra, í Garðabæ og Hafnarfirði, sem fylgja með í kaupunum. Á síðasta ári var samanlögð velta Kjarnavara og dótturfélaga um 4 milljarðar króna, með EBITDA upp á 574 milljónir króna.

Andri Þór Guðmundsson, forstjóri Ölgerðarinnar, segir að fyrirtækið sjái mikla möguleika í Kjarnavörum, sem hafi styrkt stöðu sína frá stofnun og sé nú eitt öflugasta framleiðslufyrirtæki landsins á sínu sviði. Guðjón Rúnarsson, framkvæmdastjóri Kjarnavara, bætir við að fyrirtækið hafi vaxið jafnt og þétt síðan það var stofnað, þökk sé frábæru starfsfólki, skýrri framtíðarsýn og öflugu gæðaeftirliti í framleiðslu.

Kjarnavörur sérframleiða fyrir mörg leiðandi fyrirtæki í verslunar og veitingageiranum.

Myndir: kjarnavorur.is