Nýtt kaffihús opnar við Ráðhústorgið á Akureyri

Ármann Atli Eiríksson eigandi Kaffipressunnar

Nýtt kaffihús opnar bráðlega við Ráðhústorgið á Akureyri. Eigandi staðarins er Ármann Atli Eiríksson sem rekið hefur Kaffipressuna undanfarin fjögur ár.

„Þetta verður sérkaffi staður, þ.e.a.s. aðaláherslan verður á kaffið sjálft en ekki á staðinn eða þjónustuna. Við verðum ekki svona kaffihús þar sem þú sest niður í kaffi og kökur í marga klukkutíma, það er nóg af slíkum kaffihúsum í miðbænum.

Þessi staður er fyrst og fremst hugsaður fyrir kaffiunnendur sem vilja mikil gæði og finnst gaman að fylgjast með þegar kaffibollinn þeirra er útbúinn af kostgæfni.“

segir Ármann Atli í samtali við akureyri.net og útskýrir að hann sjái fyrir sér að fólk komi til hans til þess að fá bolla af gæðakaffi sem það drekki standandi á staðnum eða tylli sér við barborð eða taki bollann með á göngu um miðbæinn. Nánari umfjöllun á akureyri.net hér.

Kaffipressan var stofnuð í janúar 2020 og hóf formlega starfsemi sína í færanlegum kaffivagni í byrjun júlí sama ár. Fyrsta sumarið var vagninn staðsettur á verönd Knattspyrnufélags Akureyrar, þar sem leitin að bestu uppáhellingunni hófst.

Árið 2021 var stefnan sett á kaffibaunamarkaðinn. Kaffipressan hóf viðræður við African Coffee Co., lúxus kaffibrennslu í London sem sér um baunirnar þeirra í dag. Einnig fór vefsíðan í loftið þar sem viðskiptavinum gefst kostur á að panta sér kaffibaunirnar í gegnum netið.

Með fylgir myndband sem sýnir viðtal við Ármann sem að N4 tók við hann árið 2020:

Mynd: skjáskot úr myndbandi