Nýr veitingastaður á Skólavörðustíg

Ostabúðin restaurant er ein viðbótin í flóru veitingastaða í 101 Reykjavík, en hann er staðsettur við hliðina á Ostabúðinni við Skólavörðustíg 8 og eigandi beggja staða er Jóhann Jónsson matreiðslumaður.

Framkvæmdir í fullum gangi
Mynd tekin 9. maí s.l.

Ostabúðin restaurant tekur 50 manns í sæti og eru framkvæmdir í fullum gangi.

Opnum veitingahús inni í sælkeraversluninni okkar og verður búðin opin samhliða til kl 21:00 öll kvöld. Leggjum áherslu á að nota hráefni úr sælkeraversluninni okkar en munum að sjálfsögðu bjóða áfram upp á fisk dagsins í hádegi sem og létta rétti sem hafa verið í boði undanfarin ár.

Klukkan 17:00 bætist við léttur kvöldverðarseðill með forréttum og aðalréttum á þægilegu verði,

sagði Kristján Edilon framreiðslumaður í samtali við veitingageirinn.is.

Framreiðslumenn staðarins eru Kristján Edilon, Þórður „Doddi“ Viðar Gunnarsson og Sigurður „Súddi“Sigurðarson og matreiðslumenn eru Óli Már Erlingsson, Pálmi Gunnlaugur Hjaltason, Ásmundur Tómas Harðarson.

Ostabúðin restaurant er framlenging á því sem Ostabúðin er búin að bjóða upp á undanfarin ár og eldhúsið verður opið eins og áður segir frá hádegi til kl 21:00 alla daga vikunnar.

Opnar þegar verkfallið hjá lögfræðingum sýslumanns er lokið,

sagði Kristján að lokum, aðspurður um hvenær opnar.