Fiskbúðin í Fjallabyggð opnuð á ný eftir töluverðar breytingar – Hákon: „verður áfram gamla góða fiskbúðin…“

Fiskbúð Fjallabyggðar opnaði nú á dögunum eftir miklar og vel heppnaðar breytingar.  Eigendur fiskbúðarinnar, eru þau Valgerður Þorsteinsdóttir og Hákon Sæmundsson matreiðslumaður.

Sjá einnig: Miklar framkvæmdir í Fiskibúð Fjallabyggðar

Opnunartími er frá 11:00 – 17:00 alla virka daga. Einnig opið á stórum helgum eins og t.d þjóðlagahátíðinni.

Brjóta þurfti upp öll gólf, skipt var um allar skolplagnir, sett upp nýtt afrennsli við afgreiðsluborð, raflagnir voru endurnýjaðar, sett upp ný salernisaðstaða og gólfið var síðan flotað og lakkað.

„Þetta verður áfram gamla góða fiskbúðin.  Aðal breytingin er að geta fengið sér sæti inni og notið þess að sitja inni með gómsætri súpu eða fisk og frönskum,“

sagði Hákon í samtali við veitingageirinn.is aðspurður um áherslubreytingar.

Hákon Sæmundsson matreiðslumaður

Áður var ekki hægt að sitja inni þar sem afgreiðsla á fiskisúpunni og klassíska breska réttinum Fish & chip var nær eingöngu „Take away“.  Eftir framkvæmdirnar hafa bæst við þrjú borð þar sem tveir til þrír geta setið við hvert borð og að auki eitt langborð fyrir fjóra til fimm manns og er stefnt að því að bæta við einu borði til viðbótar.

T.h. Valgerður Þorsteinsdóttir afgreiðir hinn margrómaða rétt fisk og franskar

Fréttamaður veitingageirans leit við hjá Hákoni og smakkaði á fiskisúpunni sem allir eru að tala um.  Virkilega góð súpa, silkimjúk og troðfull af fiskmeti. Fiskbúðin býður ennig upp á hinn margrómaða rétt fisk og franskar.

Björn Valdimarsson tók meðfylgjandi ljósmyndir frá formlegri opnun fiskbúðarinnar.

Myndir: bjornvald.is