Einar Geirs og Árni elduðu á einni stærstu sjávarútvegssýningu í heiminum

Einar Geirsson og Árni þór Árnason

Seafood Expo Global er ein af þessum stóru og flottu sjávarútvegssýningunum sem haldnar eru í heiminum og er þetta í 26. skiptið sem Ísland er með á þessari sýningu sem haldin var 21. – 23. apríl s.l. í Brussel í Belgíu.

Í ár voru það um 30 íslensk fyrirtæki sem tóku þátt og Samherji var eitt þeirra. Samherji fékk þá Einar Geirsson matreiðslumeistara og eiganda Rub 23 á Akureyri og Árna þór Árnason matreiðslumann á Rub 23 að kynna ýmsar afurðir og elda á bás Samherja á sýningunni.

Í samtali við veitingageirinn.is sagði Einar að hann hefði fyrst farið með Samherja árið 2006, þannig að hann ætti að vera orðinn kunnugur staðháttum.

Meðal þess sem þeir kynntu var bleikja, lax, þorskhnakkar, gellur, kinnfisk og saltfisk þunnildi eða migas er það kallað og fer aðallega á spánarmarkað.

Meðfylgjandi myndir eru frá kynningunni á bási Samherja, þar sem þeir félagar eru á heimavelli.

/Sverrir