Dagleg ostneysla tengist lægri áhættu á heilabilun

Ný rannsókn bendir til þess að neysla á feitum osti geti tengst minni líkum á heilabilun meðal eldra fólks. Greint er frá niðurstöðunum í nýjasta tölublaði Bændablaðsins þar sem fjallað er um rannsókn sem unnin var við Háskólann í Lundi í Svíþjóð.

Rannsóknin var leidd af Emily Sonestedt, lektor í faraldsfræði, og samstarfsfólki hennar. Markmið hennar var að kanna hvort neysla á feitum osti hefði áhrif á líkur á heilabilun síðar á ævinni. Fylgst var með tæplega 28 þúsund einstaklingum í allt að 25 ár. Meðalaldur þátttakenda við upphaf rannsóknarinnar var 58 ár og á rannsóknartímanum greindust 3.208 þeirra með heilabilun.

Að teknu tilliti til lífsstílsþátta á borð við hreyfingu, matarvenjur, reykingar og áfengisneyslu kom í ljós að þeir sem neyttu að jafnaði 50 gramma af feitum osti á dag voru 13 prósent ólíklegri til að greinast með heilabilun en þeir sem borðuðu minna en 15 grömm á dag. Feitur ostur var í þessu samhengi skilgreindur sem ostur með meira en 20 prósent fitu.

Þá bentu gögnin einnig til neikvæðrar fylgni milli rjómaneyslu og heilabilunar. Á hinn bóginn virtust mjólkurvörur með lágu fituinnihaldi ekki hafa sömu verndandi áhrif á heilsu heilans.

Fjórðungur þátttakenda borðaði meira en 50 grömm af feitum osti á dag. Í umfjöllun á vef Háskólans í Lundi kemur fram að þegar litið var til tiltekinna tegunda heilabilunar mældust allt að 29 prósent minni líkur á æðatengdri heilabilun hjá þeim sem neyttu meira af feitum osti. Einnig virtist aukin ostneysla tengjast minni líkum á Alzheimer-sjúkdómi hjá þeim sem báru ekki APOE e4 genabreytinguna, sem talin er áhættuþáttur sjúkdómsins.

Í umfjölluninni er skýrt tekið fram að rannsóknin leiði ekki í ljós orsök heldur tengsl. Þær gefa þó tilefni til frekari rannsókna á hlutverki fituríkra mjólkurvara í mataræði eldra fólks og mögulegum áhrifum þeirra á heilsu heilans.

Mynd: úr safni