Ætlar þinn veitingastaður að taka þátt í heimsviðburði? Skráning er hafin

Þann 21. mars 2016 verður endurtekinn leikurinn frá liðnu vori: Meira en 1000 matreiðslumenn í fimm heimsálfum votta franskri matargerð virðingu sína í veislunni Goût de France / Good France.

Öll veitingahús, sem taka þátt í veislunni, framreiða kvöldverð, innblásinn af bestu kostum franskrar matargerðar og þeim gildum sem þessi matgerðarlist grundvallast á: sköpunargleði, samneyti, gleði, virðingu fyrir matarnautninni, náunganum og umhverfinu.

Matstaðirnir geta spannað allan skalann, frá grillhúsum til stjörnustaða og bjóða máltíðir úr ferskum árstíðabundnum afurðum sem upprunnar eru af næstu grösum, og þar sem sparlega er farið með fitu, sykur og salt.

Engan veginn er ætlast til að matreiðslumennirnir snúi baki við sinni matarhefð heldur er leikurinn til þess gerður að þeir blandi saman eigin matargerð og þeirri frönsku.

Eftirfarandi á að vera rauði þráðurinn í matseðlinum:

• Fordrykkur og “með honum”
• Forréttur
• Einn eða tveir aðalréttir
• Ostabakki
• Eftirréttur
• Frönsk vín og kampavín

Hægt er að skrá sig til þátttöku í veislunni með því að smella hér. Síðar geta þeir útlistað hvernig matseðil þeir ætla að bjóða.

Fleira tengt efni:

Gallery Restaurant á Hótel Holti tekur þátt í Goût de France