Danól og Ölgerðin til sölu

Eigendur Daníels Ólafssonar ehf., sem rekur heildsölufyrirtækið Danól, hafa ákveðið að selja fyrirtækið og allar eignir þess, þar með talda Ölgerðina Egill Skallagrímsson ehf.

Verða félögin seld saman eða hvort í sínu lagi að því gefnu að ásættanlegt kauptilboð berist.

Sölumeðferðin er í höndum MP Fjárfestingarbanka hf. og er áætlað að hún taki um sex vikur.

Rekstur Danól og Ölgerðarinnar hefur gengið mjög vel undanfarin ár og var árið 2005 besta ár í rekstri beggja fyrirtækja frá upphafi. Velta Danól hefur vaxið jafnt og þétt og var 2,3 milljarðar 2005. Ölgerðin hefur vaxið um 50% frá því í janúar 2002 og var velta fyrirtækisins í fyrra um 5,5 milljarðar. Bæði fyrirtæki eru með mjög sterka markaðshlutdeild. Mikil tækifæri eru til frekari vaxtar hjá hvoru fyrirtæki um sig og samlegðaráhrif fyrirtækjanna geta verið veruleg.

Einar Friðrik Kristinsson, sem verið hefur framkvæmdastjóri Danól í 42 ár, hættir störfum á þessum tímamótum. „Ég hef verið lengi í þessum rekstri og finnst kominn tími til að draga mig í hlé. Nú eru góðar aðstæður til að selja enda margir fjársterkir aðilar sem hafa bolmagn til að kaupa. Við viljum koma fyrirtækjunum í hendur traustra aðila sem geta haldið uppbyggingu rekstrarins áfram og tryggt starfsfólkinu öruggt starfsumhverfi. Margir hafa sýnt fyrirtækjunum áhuga enda er um að ræða afar sterk og vel rekin fyrirtæki með afbragðs starfsfólk og mikla framtíðarmöguleika.“

Danól er eitt stærsta innflutnings- og dreifingarfyrirtæki landsins og leiðandi í innflutningi og markaðssetningu á mat- og sérvöru fyrir verslanir, bakarí og stóreldhús. Danól selur einungis vörur frá erlendum framleiðendum og hefur lagt metnað sinn í að bjóða besta fáanlega verð hverju sinni í harðri samkeppni við innlenda innflutningsaðila og erlend vöruhús. Styrkur félagsins felst meðal annars í breiðu vöruúrvali og góðri áhættudreifingu, markaðsleiðandi vörumerkjum, stærðarhagkvæmni, öflugri liðsheild og framúrskarandi tæknilausnum í rekstrinum. Meðal heimsþekktra vörumerkja Danól eru Merrild, Nestlé, Nescafé, Duni, Neutral, Oroblu, Quality Street, KitKat og After Eight. Vörumerki Danól eru með leiðandi stöðu á sínum markaði, flest í fyrsta eða öðru sæti.

Danól er rótgróið fjölskyldufyrirtæki sem stofnað var 1932. Eigendur félagsins eru hjónin Einar Friðrik Kristinsson framkvæmdastjóri og Ólöf Októsdóttir. Höfuðstöðvar Danól eru í Skútuvogi 3. Hjá fyrirtækinu starfa um 60 manns. Vöxtur Danól hefur verið hraður en fyrirtækið hefur keypt 21 innflutningsfyrirtæki frá 1985. Sjö þeirra voru sameinuð Ölgerðinni 2003. Danól hefur komið vel út í árlegum könnunum VR og hlotið fjölmargar viðurkenningar frá ÍMARK fyrir auglýsingar og markaðsherferðir.

Ölgerðin Egill Skallagrímsson ehf., sem stofnuð var 1913, hefur verið í eigu Danól frá því í apríl 2002. Ölgerðin er eitt þekktasta og stærsta iðnfyrirtæki landsins með nær 600 vörunúmer og 130 starfsmenn. Fyrirtækið er með starfsstöðvar í Reykjavík, á Ísafirði, Akureyri, Egilsstöðum og í Borgarnesi. Ölgerðin framleiðir, flytur inn, dreifir og markaðssetur gosdrykki, vatn, öl, bjór, léttvín, sterkt áfengi og snakk. Ölgerðin er leiðandi í sölu og markaðssetningu á gosi, með yfir 40% markaðshlutdeild, og vatni þar sem markaðshlutdeild er yfir 70%. Ölgerðin er næststærsti innflutningsaðili landsins á léttvínum og hefur vaxið hraðast á þessum ört vaxandi markaði. Ölgerðin rekur sterkvínsframleiðslu fyrir innlendan og erlendan markað í Borgarnesi. Vatnsútflutningur tvöfaldaðist á síðasta ári en þá voru rúmlega 400 gámar af vatni fluttir á erlenda markaði.

Styrkur Ölgerðarinnar felst m.a. í breiðu vöruúrvali og góðri áhættudreifingu, vörumerkjum sem eru leiðandi á markaðnum, stærðarhagkvæmni, öflugri vöruþróun og tæknivæddri famleiðslu en brugghús Ölgerðarinnar er eitt það fullkomnasta í Evrópu. Þá nýtur Ölgerðin góðs orðspors og trausts viðskiptavina. Meðal þekktra vörumerkja Ölgerðarinnar eru Egils Malt og Egils Appelsín, Pepsi, Kristall og Kristall Plús, Rosemount, Egils Gull, Tuborg, Brennivín, Smirnoff, Gatorade og Doritos. Pepsi Max er með stærstu hlutdeildina á ört vaxandi markaði fyrir sykurlausa drykki. Ölgerðin var kosin markaðsfyrirtæki ársins 2002 og hefur fengið fjölda viðurkenninga ÍMARK fyrir auglýsingar og markaðsherferðir. Fjögur undanfarin ár hefur Ölgerðin notið mestrar ánægju allra fyrirtækja í könnun sem Íslenska ánægjuvogin gerir meðal viðskiptavina. Nánari upplýsingar veita:

Danól / Ölgerðin: Einar F. Kristinsson í síma 892 0341 og Októ Einarsson í síma 894 5253.

Fyrirtækjasvið MP Fjárfestingarbanka hf.: Friðrik Einarsson í síma 822 3228

Greint frá á heimasíðum Ölgerðarinnar og Danól

[email protected]