Ný fiskbúð með gott úrval af sushi opnar í Reykjanesbæ

Magnús Heimisson, Arnar Ingólfsson og Bjarni Geir Lúðvíksson

Nútíma fiskbúð í Reykjanesbæ, með ferskan fisk, fiskrétti og sushi opnaði 18 júní s.l. Fiskbúðin sem heitir Beint úr sjó er staðsett í verslunarkjarnanum við Fitjar, en þar er t.a.m. Subway, bakaríið Kornið, Bónus, Hagkaup og Húsasmiðjan.

Eigendur eru Bjarni Geir Lúðvíksson og Magnús Heimisson.

Boðið er upp á um 8-12 fiskrétti, gott úrval af sushi og einnig er hægt að kaupa forsnar vörur t.a.m. humar, risarækjur, hörpudisk og fleira.

Arnar Ingólfsson matreiðslumaður er á meðal starfsfólks, en hann sér meðal annars um að útbúa sushi og fiskréttina. Arnar lærði fræðin sína á Bláa Lóninu frá júni 2010 og útskrifaðist vorið 2014. Arnar þekkir vel inn á sushi, enda er mikið af sushi í boði á veitingastaðnum Lava í Bláa Lóninu sem er einn af þessum metnaðarfullu veitingastöðum á Íslandi þar sem þeir félagar Viktor Örn Andrésson og Þráinn Freyr Vigfússon stjórna með glæsibrag.

Beint úr sjó er staðsett í verslunarkjarnanum við Fitjar í Reykjanesbæ

Til gamans má geta að Arnar er mikið í tónlistinni og hentar dagvinnan honum mjög vel, en hann spilar á bassa og það í þremur hljómsveitum SíGull, Par Ðar og AvÓkA, að auki var Arnar valinn bassaleikari Músiktilrauna nú í mars s.l.

Þennan sushi bakka keypti fréttamaður veitingageirans

Fréttamaður veitingageirans heimsótti um daginn verslunina Beint úr sjó og keypti sér sushi, en hingað til hefur gott sushi ekki verið í boði í verslunum á öllu Reykjanesinu og hafa sushi unnendur þurft að keyra til Reykjavíkur til að versla sér gott sushi.

Sushi frá Beint úr sjó er fjölbreytt, inniheldur ekki of mikið edikbragð eða passlega mikið til að bragðið af grjónunum finnst. Allar tegundir sem fréttamaður fékk voru ferskar að undanskyldu rækju-topping. Virkilega bragðgott sushi.

Heimasíða: www.beintursjo.com

Instagram: instagram.com/beintursjo

Facebook: Beint úr sjó