Veitingarekstur á KEF varð ósjálfbær – Reksturinn skilaði milljarðatapi

Veitingasvæðið Aðalstræti á Keflavíkurflugvelli

Lagardère Travel Retail ehf. hefur lokið starfsemi sinni hér á landi eftir að félagið tapaði 1.349 milljónum króna á síðasta ári. Þetta kemur fram í ársreikningi félagsins og er greint frá málinu á vb.is.

Félagið hafði skilað hagnaði undanfarin ár, 205 milljónum króna árið 2023 og 291 milljón árið 2022, en velta dróst saman um 11 prósent á síðasta ári og nam 3.641 milljón króna.

Í lok júlí sagði Lagardère upp samningi sínum við Isavia, sem átti að gilda til ársins 2030. Félagið sá þá um rekstur nokkurra veitingastaða á flugvellinum, þar á meðal mathallarinnar Aðalstrætis, Bakað-kaffihúsanna, Loksins Café & Bar, KEF Diner og Sbarro.

Í ársreikningi kemur fram að umfangsmiklar breytingar á veitingasvæði Keflavíkurflugvallar á árinu 2024 hafi valdið miklu rekstrarlegu raski. Félagið lokaði arðbærum stöðum og opnaði átta nýja veitingastaði samkvæmt forskrift Isavia. Fjárfestingar vegna þeirra námu alls 803 milljónum króna á árunum 2023 og 2024.

Sjá einnig: Árið 2024 var stórt ár fyrir matgæðinga á KEF

Nýju staðirnir stóðu ekki undir væntingum og sala á hvern farþega lækkaði um 17 prósent, úr 526 krónum í 437 krónur. Reksturinn var sagður orðinn ósjálfbær á árinu 2024 og horfur slæmar, sem leiddi að lokum til þess að Lagardère ákvað að hætta veitingarekstri á Keflavíkurflugvelli. Greint er nánar frá málinu á vb.is.

Mynd: kefairport.is