Þrjátíu ár við stjórnvölinn – Bjarki Hilmarsson heiðraður

Þórir Erlingsson, forseti Klúbbs matreiðslumeistara, afhendir Bjarka Ingþóri Hilmarssyni sérstaka viðurkenningu.

Á lokahófi keppninnar Kokkur ársins 2026, sem fram fór við hátíðlega athöfn á NASA í Parliament Hótel í gær, var Bjarka Ingþóri Hilmarssyni veitt sérstök viðurkenning fyrir framlag hans til keppninnar í gegnum árin.

Í tilkynningu frá Klúbbi matreiðslumeistara kemur fram að Bjarki hafi frá upphafi haft yfirumsjón með keppninni og gegnt lykilhlutverki í þróun hennar, uppbyggingu og framkvæmd.

„Undir hans stjórn hefur keppnin fest sig í sessi sem ein sú virtasta innan íslenskrar matargerðar,“

segir meðal annars í tilkynningunni.

Þar er einnig bent á að Bjarki hafi lagt ríka áherslu á fagleg vinnubrögð, sanngjarnt matsferli og stöðuga þróun keppninnar í takt við alþjóðleg viðmið. Framlag hans hafi þannig haft mikil áhrif á stöðu keppninnar í dag og þann sess sem hún skipar í íslensku faglífi.

Viðurkenningin markaði jafnframt tímamót, en þetta var í 30. sinn sem Bjarki hefur haft yfirumsjón með keppninni. Að sögn klúbbsins hefur hann með elju og fagmennsku haft áhrif á fjölmarga matreiðslumenn og þróun greinarinnar hér á landi.

Gestir á lokahófinu fögnuðu þessum áfanga og þökkuðu Bjarka fyrir framlag hans til íslenskrar matargerðar.

Mynd: Hafliði Breiðfjörð