Það þarf ekki mikinn tíma til að búa til stórkostlega ítalska vefju

Það elska allir einfaldar hugmyndir! Hér kemur sannarlega ein undurljúffeng og einföld. Þessir bitar henta vel í veislur, nestisboxið, hádegismatinn eða hvað sem ykkur dettur í hug. Auðvitað má leika sér aðeins með hráefnið en rjómaosturinn er hér lykilatriði.

Til dæmis er hægt að bæta við klettasalati eða sleppa hráskinku fyrir þá sem vilja svo það er um að gera að útbúa sína uppáhalds ítölsku vefju.

Ítalskar vefjur uppskrift

Um 15 bitar

3 stórar mjúkar vefjur
½ dós af rjómaosti með tómötum og basilíku frá MS
1 stór tómatur
1 lúka af ferskri basilíku
3 sneiðar af hráskinku

Aðferð:

Smyrjið vefjurnar með rjómaostinum.

Sneiðið tómatinn í þunnar sneiðar og skiptið niður í vefjurnar, um 4 sneiðar í hverja.

Setjið vel af basilíku ofan á tómatsneiðarnar og loks hráskinkusneið.

Rúllið þétt upp og skerið í bita.