Róbert Aron Proppé keppir fyrir Íslands hönd á Evrópumótinu í kokteilagerð

Róbert Aron Proppé, Íslandsmeistari í kokteilagerð, er kominn til Protaras á Kýpur þar sem hann tekur þátt í Evrópumótinu í kokteilagerð. Með honum í för er Pétur Hafsteinn Úlfsson Kolka, ritari Barþjónaklúbbs Íslands.

Pétur Hafsteinn Úlfsson Kolka

Róbert keppir með kokteilinn Pillow Talk, sem inniheldur Gin Mare, Monin ástaraldin-puré, Monin kókoshnetusýróp og engiferbjór. Drykkurinn er skreyttur með greipaldinshýði og limeblaði festu með kokteilapinna. Keppt er í svokölluðum „Long Drink“ flokki, þar sem drykkir eru yfirleitt framreiddir í háum glösum og fylltir upp með gosi eða öðru áfyllingarefni.

„Ég er fullur tilhlökkunar,“

segir Róbert, sem er í toppformi fyrir keppnina.

„Ég náði topp 15 á heimsmeistaramótinu í fyrra og hlaut verðlaun í mínum aldursflokki, þannig að nú stefni ég á að taka þetta alla leið.“

Auk þess að keppa í drykkjagerð þarf Róbert að þreyta skriflegt próf í kokteilafræðum og er hann einnig metinn í faglegum vinnubrögðum við framreiðslu á kokteilnum sínum.

Myndir: bar.is