Heimsmeistaramót matreiðslumanna, Bocuse d’Or, fer fram dagana 24.–25. janúar 2027 í Lyon í Frakklandi, samhliða alþjóðlegu Sirha Lyon-fagsýningunni. Keppnin verður sérstaklega hátíðleg að þessu sinni þar sem 40 ár eru liðin frá því að Bocuse d’Or var fyrst haldin.
Snædís Xyza Mae Jónsdóttir, Bocuse d’Or-keppandi Íslands, mun keppa fyrir Íslands hönd.
Bocuse d’Or er ein virtasta matreiðslukeppni heims þar sem fremstu matreiðslumenn þjóðanna etja kappi og sýna hæfileika sína, fagmennsku og sköpunargáfu undir mikilli tímapressu.
Jérôme Bocuse hefur bent á að 40 ára afmælisútgáfa keppninnar staðfesti mikilvægi Bocuse d’Or sem vettvangs fyrir matargerð framtíðarinnar, þar sem kröfur um gæði og framúrskarandi árangur aukast með hverri keppni.
Sirha Lyon – einn stærsti viðburður matvæla- og veitingageirans
Sirha Lyon er ein stærsta og mikilvægasta fagsýning heims á sviði matvæla, matreiðslu og veitingareksturs. Þar koma saman yfir 4.700 sýnendur og vörumerki ásamt rúmlega 257.000 fagfólki úr greininni.
Á sýningunni fara meðal annars fram tvær af virtustu matreiðslu- og konditorkeppnum heims, Bocuse d’Or og Coupe du Monde de la Pâtisserie, heimsmeistaramót konditora.
Fremstu matreiðslumenn heims keppa um gullið
Keppendur sem hafa tryggt sér þátttökurétt í gegnum undankeppnir í Evrópu munu mæta þeim sem komast áfram úr undankeppnum í Ameríku, Afríku, Asíu og Kyrrahafssvæðinu og Mið-Austurlöndum.
Allir stefna þeir að sama marki, að hreppa hinn eftirsótta gullverðlaunagrip Bocuse d’Or 2027 og tryggja sér sess í sögu matreiðslunnar.
Fyrir keppendur er þátttaka í Bocuse d’Or einstakt tækifæri til að sýna hæfileika sína á alþjóðlegum vettvangi og getur árangur í keppninni haft mikil áhrif á framtíð þeirra í matreiðslugeiranum.
Fréttayfirlit hér.
Mynd: Bocusedor.com
