Nýtt kaffihús opnað við Fjöruböðin á Hauganesi

Útsýnið úr Fjörukaffi yfir pottana í Fjöruböðunum á Hauganesi.

Gestir sem leggja leið sína í Fjöruböðin á Hauganesi geta nú einnig sest niður á nýju kaffihúsi, en Fjörukaffi opnaði dyr sínar í síðustu viku.

Kaffihúsið er staðsett við Fjöruböðin á Hauganesi á Árskógsströnd í Dalvíkurbyggð, um 24 kílómetra frá Akureyri. Aðeins um tveggja kílómetra akstur er frá afleggjaranum við þjóðveginn að Hauganesi, sem hefur á undanförnum árum fest sig í sessi sem vinsæll áfangastaður jafnt fyrir heimamenn sem ferðafólk.

Á Fjörukaffi er lögð áhersla á notalega stemningu þar sem gestir geta notið útsýnis yfir Eyjafjörðinn á meðan þeir fá sér góðan kaffibolla, smurbrauð, bakkelsi eða kaldan drykk. Kaffihúsið er opið alla daga frá klukkan 12:00 til 20:00.

Fjöruböðin hafa verið í stöðugri uppbyggingu síðustu ár og er opnun kaffihússins nýr áfangi í þeirri vegferð. Samkvæmt áformum verður uppbygging svæðisins áfram umfangsmikil á næstu árum og stefnt er að því að árið 2029 verði meginhluta framkvæmda lokið. Þar er meðal annars gert ráð fyrir stækkun baðanna, nýju hóteli og sumarhúsabyggð.

Með opnun Fjörukaffis bætist því enn ein þjónustan við svæðið og gestum gefst kostur á að njóta bæði baðanna og veitinga í fallegu umhverfi við Eyjafjörð.

Mynd: Facebook / Fjöruböðin