Ný bók eftir Kristbjörn Helga, Karl Petersson og Úlfar Finnbjörns – Veislumatur að hætti landnámsmanna

Út er komin bókin Veislumatur landnámsaldar, sem á ensku heitir Feast of the vikings.

Hér er á ferðinni einstök bók sem fjallar um þann mat og það hráefni sem fyrstu íbúar Íslands höfðu úr að moða við matargerð.

Íslendingasögurnar eru ekki margorðar þegar kemur að mat. Ekki er t.d. tekið fram hvað var boðið uppá í brúðkaupi Hallgerðar og Gunnars á Hlíðarenda. Þó eru nokkrar vísbendingar að finna í sögunum auk þess sem fonleifauppgröftur hefur bætt við þekkingu á matarvenjum landnámsfólks.

Kristbjörn Helgi Björnsson sagnfræðingur hefur rannsakað sögurnar með tilliti til matar og skrifar hér um hvað stóð landnámsfólki helst til boða. Ekki nóg með það, því Úlfar meistarakokkur Finnbjörnsson tók svo við og setur hér fram nokkurs konar tilgátuuppskriftir að veislumat þessa tíma.

Hann setur t.d. fram uppskrift að heilgrilluðum geirfugli. Einnig skreiðasúpu, lambabuxum og rostungssúpu, svo fátt eitt sé nefnt.

Útkomuna festi svo Karl Petersson ljósmyndari á filmu, en Karl er einn af fremstu matarljósmyndurum landsins.

Bókin kemur bæði út á íslensku og ensku á sama tíma.

Meðfylgjandi eru kápumyndir og nokkrar opnur úr bókinni.