Netflix opnar veitingastaði og kaffihús: Matseðlar í stíl við vinsælustu seríurnar

Netflix stígur stórt skref út fyrir skjáinn með tilkomu „Netflix House“, upplifun sem sameinar vinsælustu þætti streymisveitunnar við matargerð, skemmtun og lifandi umhverfi. Fyrsti staðurinn verður opnaður í King of Prussia verslunarmiðstöðinni rétt utan við Philadelphia þann 12. nóvember 2025 og sá næsti í Galleria Dallas í Texas þann 11. desember 2025.

Matur í aðalhlutverki

Einn helsti drifkrafturinn að baki Netflix House er fjölbreytt matarupplifun sem byggir á heimi vinsælla þáttaraða. Þar verður hægt að smakka rétti sem tengjast beint við sögusvið þáttanna. Dæmi eru réttir innblásnir af Squid Game, skemmtilegar tilraunir úr Stranger Things og framandi bragð úr One Piece. Gestir geta sest niður á veitingastöðum sem eru hannaðir í anda Netflix-heima, en jafnframt gripið með sér götumat á ferðinni á svæðinu.

Í tilkynnningu frá Netflix kemur fram að í Philadelphia verður sérstök kaffihúsamenning kynnt til sögunnar, þar sem hægt verður að panta sér drykki og smárétti sem spegla persónur og sögur þáttanna. Í Dallas er áherslan meiri á fjölskylduvæna upplifun með leiksvæðum og afþreyingu, en maturinn fær engu að síður stórt hlutverk. Þar verða meðal annars boðið upp á sælkeraborgara, kokteila og dessert-bakka sem allir vísa á einhvern hátt til þekktustu þátta streymisveitunnar.

Kynningarmyndband

Meira en sýndarheimur

Þótt Netflix House sé fyrst og fremst ætlað að færa áhorfendur inn í sjónvarpsseríur á nýjan hátt, þá er matarupplifunin rauði þráðurinn sem heldur heildarmyndinni saman. Gestir geta notið þess að borða inni á sviðsmynd sem minnir á skrautlega sali úr Bridgerton eða fengið sér eftirrétt í kringum borð sem endurspeglar myrkari stemningu úr Wednesday.

Sumar upplifanir verða opnar öllum, til dæmis sýningar, ljósmyndatækifæri og almenn veitingasvæði. Sérstök ævintýri og leiksvæði, til dæmis Squid Game eða Netflix RePLAY, verða þó aðeins aðgengileg gegn greiðslu. Miðasala hefst 17. október fyrir opnun í Philadelphia og 18. nóvember fyrir Dallas.

Ný stefna í veitingaheiminum

Með Netflix House er streymisveitan ekki aðeins að skapa nýja tegund af afþreyingu heldur einnig nýja nálgun í veitingarekstri. Með því að blanda saman sjónvarpsmenningu og matargerð verða til óvenjulegir staðir sem höfða jafnt til matarunnenda sem aðdáenda sjónvarpssería. Það er því ljóst að Netflix hyggst festa sig í sessi í alþjóðlegri veitinga- og upplifunarmenningu, ekki síður en í streymi.

Mynd: netflix.com