Marel Food Systems styrkir íslenska kokkalandsliðið

Marel Food Systems verður styrktaraðili íslenska kokkalandsliðsins næstu þrjú árin og mun leggja liðinu til styrk að upphæð kr. 1.000.000 á hverju ári samningstímans. 

Styrknum verður varið til undirbúnings matreiðslukeppna hérlendis sem erlendis, þar með töldu Ólympíumóti matreiðslumanna í Erfurt í Þýsklandi sem fram fer 19.-22. október næstkomandi.  Samstarfssamningur Marel Food Systems við Klúbb matreiðslumeistara tók gildi þann 15. maí s.l. 

Hinn árlegi styrkur greiðist í formi peningastyrks að upphæð kr. 300.000, hönnunartíma hjá grafískum hönnuði að verðmæti kr. 300.000, prentun á kynningarefni að verðmæti kr. 250.000, og 40 tíma í ryðfrírri smiðju að verðmæti kr. 150.000 sem m.a. verður varið til hönnunar á keppnisborði landsliðsins á Ólympíumótinu í október.

Á móti kemur að Klúbbur matreiðslumeistara mun aðstoða Marel Food Systems við vöruþróun, kynningar, uppskriftir og auglýsingar.  M.a. mun Klúbburinn taka þátt í undirbúning og skipulagningu vegna tveggja viðburða á árinu sem haldnir verða í húsakynnum Marel.  Þá mun Klúbburinn halda nafni og vörumerki Marel á lofti í keppnum sem og hverskyns kynningum sem hann er aðili að.

Samstarfssamningurinn var undirritaður í höfuðstöðvum Marel Food Systems í Garðabæ þann 13. maí s.l.  Stella Björg Kristinsdóttir undirritaði hann fyrir hönd Marel og Alfreð Ómar Alfreðsson, nýkjörinn forseti Klúbbs matreiðslumeistara, fyrir hönd Klúbbsins.