Lúxusbrauðterta fyrir ostunnendur – dásamlega einföld

Hér sameinast eitthvað það besta og vinsælasta á veisluborðum, brauðtertan og ostasalatið og útkoman er stórkostleg. Það er um að gera að nota þá osta sem ykkur þykja bestir, en í þessari uppskrift fær camembert að njóta sín ásamt kryddostum.

Það er líka gaman að bera þessa tertu fram fyrir grænmetisætur þar sem hún inniheldur ekkert kjöt eða fisk eins og algengt er með brauðtertur.

Fyrir 10

2 rúllutertubrauð eða 1 hefðbundið brauðtertubrauð

2 Dala camembert

1 Kryddostur með hvítlauk

1 Kryddostur með svörtum pipar

1 stk. græn paprika

1 stk. stór rauðlaukur

20-30 stk. Rauð eða græn vínber

Góð handfylli fersk steinselja

3 dósir 18% sýrður rjómi frá Gott í matinn

2 dl majónes

Spírur, graslaukur, rauðlaukur, tómatar, steinselja til skrauts

Aðferð:

1. Látið brauðtertubrauðið þiðna við stofuhita á meðan þið gerið salatið.
2. Skerið ostana, grænmetið og vínberið í mjög smáa bita, saxið steinseljuna.
3. Blandið þessu öllu saman við 2 dósir sýrðan rjóma og 1 dl majónes (geymið eina dós sýrðan rjóma og 1 dl majónes til að smyrja utan á tertuna)
4. Ef þið viljið gera hringlaga brauðtertu eru skornir fjórir jafnir hringir úr rúllutertubrauðinu. Ég nota botn á tertuformi til viðmiðunar.
5. Leggið brauðið á disk og smyrjið ostasalatinu jafnt á þannig að þið fáið þrjár hæðir af salatinu.
6. Leggið að lokum brauð efst. Hrærið saman 1 dl af majónesi við eina dós af sýrðum rjóma og smyrjið vel yfir tertuna og niður allar hliðar.
7. Tertan geymist vel í ísskáp í sólarhring. Skreytið tertuna að vild og berið fram.

Skoða nánar á www.gottimatinn.is