Keyptu gamlan pulsuvagn, rifu allt út úr honum og innréttuðu upp á nýtt – Selja grimmt af Napólí pizzum

Nýjasta viðbótin í veitingaflóruna í miðborg Reykjavíkur er pizzuvagninn Pizza Port sem er að finna við Laugaveg 48.

Þar standa vaktina tveir ungir menn og reiða fram súrdeigspizzur sem bakaðar eru í Ooni pizzaofnum sem notið hafa mikilla vinsælda síðustu misseri.

„Við fengum bullandi pizzu-dellu í covid. Okkur langaði alltaf að gera eitthvað svona saman og ákváðum síðasta sumar að kýla á það. Síðan þá höfum við unnið að undirbúningi og nú er þetta komið af stað,“

segir Emil Bjartur Sigurjónsson í samtali við mbl.is. Opið er alla daga frá klukkan 11:30 til 21:00.

Hann og félagi hans Eiríkur Atli Karlsson hafa haft í nógu að snúast síðan vagninn var opnaður fyrr mánuði. Þeir félagar festu kaup á gömlum pulsuvagni, rifu allt út úr honum og innréttuðu upp á nýtt. Pizzurnar eru Napólí pizzur úr súrdeigi og hægt er að velja úr nokkrum tegundum af matseðli.

Myndir: facebook / Pizza Port