Fyrsti íslenski keppandinn í vikunni Axel Þorsteinsson kominn af stað í Global Pastry Chefs Challenge

Axel Þorsteinsson

Nú stendur yfir keppnin „Global Pastry Chefs Challenge“ um besta konditor Norður Evrópu yfir í Álaborg í Danmörku. Keppnin hófst snemma morguns og lýkur síðdegis.

Hafliði Ragnarsson súkkulaðimeistari úr Mosfellsbakarí er fulltrúi Íslands í dómnefndinni

Íslenski keppandinn Axel Þorsteinsson er 26 ára og starfar á Apótek Restaurant.

Axel sigraði í keppninni „bakari ársins“ árið 2011. Axel er bjartsýnn og einsetur sér að gera sitt besta.

Keppnin er spennandi og mikil reynsla sem maður fær í keppni sem þessari. Reynslan nýtist í framtíðinni í áframhaldandi keppnum og í mínu fagi við eftirréttagerð.

Segir Axel sem stefnir á frekari keppnir og var nýlega valinn í Kokkalandsliðið.

Axel gerir í keppninni eftirrétti og sýningarstykki sem svo er dæmt af hópi dómara. Hafliði Ragnarsson súkkulaðimeistari úr Mosfellsbakarí er fulltrúi Íslands í dómnefndinni.

Keppnisúrslit í „Global Pastry Chefs Challenge“ verða tilkynnt föstudagskvöld 5. júní og mun sigurvegari Norður Evrópu keppninnar keppa á næsta ári í alþjóðlegri úrslitakeppni um titilinn „Global Pastry Chef“, að því er fram kemur í fréttatilkynningu frá Klúbbi Matreiðslumeistara.

Það er Klúbbur matreiðslumeistara sem sendir sex keppendur til leiks í sex einstaklingskeppnum í Danmörku dagana 4.-6. júní, en klúbburinn hefur ávallt unnið að eflingu íslenskrar matreiðslu og matarmenningar með rekstri Kokkalandsliðsins.

Myndir: Sveinbjörn Úlfarsson