Ferskar, sætar og ómótstæðilegar sumarsnittur – Rjómaostur með hvítu súkkulaði breytir öllu

Þessar snittur koma svo skemmtilega á óvart og eru fullkomnar á veisluborð með köldum drykk. Rjómaostur með hvítu súkkulaði er stjarnan og passar einstaklega vel með ferskum ávöxtum, myntu og límónu.  Það er Helena Gunnarsdóttir, matgæðingur hjá Gott í matinn, sem færir ykkur þessa girnilegu uppskrift.

Sætar sumarsnittur

1 stórt snittubrauð

smjör eftir þörfum

1 askja jarðarber

15 græn vínber

1 vel þroskað mangó

1 Rjómaostur með hvítu súkkulaði

2 msk. sykur

1 límóna

nokkur fersk myntulauf

Aðferð:

1. Skerið snittubrauðið í þunnar sneiðar og steikið upp úr smjöri á pönnu þar til fallega gyllt báðu megin. Raðið á disk og látið kólna.
2. Skerið ávextina mjög smátt og blandið saman í skál.
3. Rífið börkinn af einni límónu og setjið í skál ásamt sykri og nokkrum smátt söxuðum myntublöðum. Blandið þessu vel saman.
4. Smyrjið u.þ.b. 2 tsk. af rjómaostinum á hverja snittu. Dreifið ávaxtablöndunni yfir og toppið loks með límonu, myntusykrinum og skreytið með myntublaði.
5. Berið fram strax.