Ferköntuðu hamborgararnir komnir við Tryggvagötu

Ferkantaðir hamborgarar verða áfram í aðalhlutverki á Litlu Fabrikkunni við Tryggvagötu.
Mynd: Facebook / Íslenska Hamborgarafabrikkan

Litla Fabrikkan, systurveitingastaður Hamborgarafabrikkunnar, hefur verið opnuð við Tryggvagötu í Reykjavík, í húsnæðinu þar sem Grillhúsið var áður til húsa.

Opnun staðarins tafðist um tæpa þrjá mánuði vegna leyfismála hjá Reykjavíkurborg. Mbl.is greinir frá því að bráðabirgðaleyfi hafi nú fengist á meðan ný teikning af húsnæðinu er til afgreiðslu.

Litla Fabrikkan, systurveitingastaður Hamborgarafabrikkunnar.
Mynd: Facebook / Íslenska Hamborgarafabrikkan

Ferköntuðu hamborgararnir, sem Hamborgarafabrikkan er þekkt fyrir, verða áfram í aðalhlutverki en matseðillinn verður að hluta sniðinn að ferðamönnum og þeim sem búa og starfa í miðborginni. Jafnframt stendur til að leggja aukna áherslu á fisk og sjávarfang.

Fabrikkan opnaði á Höfðatorgi fyrir 16 árum.
Mynd: Facebook / Íslenska Hamborgarafabrikkan

Helgi Hermannsson hjá Fabrikkunni segir í samtali við mbl.is að einnig verði boðið upp á uppistand, lifandi tónlist og aðra skemmtun á kvöldin. Markmiðið sé að skapa létta barstemningu á staðnum.

Formleg opnunarhátíð Litlu Fabrikkunnar fer fram í dag, laugardaginn 29. ágúst, klukkan 14.00.

Nánar má lesa um Litlu Fabrikkuna í umfjöllun mbl.is.