Er verið að selja þér rækjur á fáránlegu verði? Bíræfnir þjófar stálu tveimur tonnum af rækjum

Myndin tengist fréttinni ekki beint.

Lögreglan á Norðurlandi vestra rannsakar býsna bíræfinn þjófnað en tveimur tonnum af rækjum var stolið frá einni elstu rækjuverksmiðju landsins, Meleyri á Hvammstanga, um helgina.

Baldvin Þór Bergþórsson, verkefnisstjóri rækjuvinnslunnar, segir í samtali við fréttastofu RÚV að upp hafi komist um þjófnaðinn á laugardagsmorgun. Lás hafi verið brotinn á frystigámi og rækjurnar horfnar.

Hann áætlar að „götuvirði“ rækjanna sé í kringum 5 til 6 milljónir. „Þetta er svolítið mikið,“ segir Baldvin.

Rækjurnar eru pakkaðar í tíu kílóa kassa.

Þeir sem vita einhverjar upplýsingar um þetta mál, að vinsamlegast hafa samband við lögregluna á Norðurlandi vestra.

Mynd: úr safni