Enginn yfir 130 kílóum fær að gista á hótelinu

Beachhotel Sahlenburg í bænum Cuxhaven í Þýskalandi

Hóteleigendur Beachhotel Sahlenburg í bænum Cuxhaven í Þýskalandi hafa sett þyngdartakmörk á viðskiptavini sína til þess að vernda rándýr húsgögn hótelsins. Enginn yfir 130 kílóum fær að gista á hótelinu, hefur vefmiðillinn The Local eftir eigendunum, sem að ruv.is vekur athygli á.

Hótelstjórinn Angelika Hargesheimer segir í samtali við þýska fjölmiðilinn Buten und Binnen að sígild húsgögn hótelsins séu ekki smíðuð fyrir stórt fólk. Hún kveðst brennd af því að taka á móti þungum gestum, því einn þeirra hafi brotið rúm í einu herbergjanna. Þá ákvað hún að setja nýjar reglur um viðskiptavini hótelsins. Auk þess segir hún stóla hótelsins óþægilega fyrir íturvaxið fólk og sturtuklefana of þrönga.

Á vef Ríkisútvarpsins segir að óljóst er hvort regla hótelsins standist lög. Þýska dagblaðið Bild hefur eftir Sebastian Bickerich, starfsmanni mannréttindaskrifstofu þýska ríkisins, að lög gegn mismunun á fólki með offitu virki aðeins ef offitan er það mikil að hún teljist til fötlunar. Því gæti orðið erfitt fyrir væntanlega viðskiptavini hótelsins að höfða mál gegn því.

Mynd: skjáskot af google korti.