Endapunktur á áratuga sögu – Heilsuhúsið kveður

Hér fann fagfólk í veitingageiranum hráefni sem annars var erfitt að nálgast. Fyrir marga var þetta fyrsta stopp áður en hugmyndir urðu að réttum.

Heilsuhúsið í Kringlunni, síðasta verslunin sem starfaði undir þessu rótgróna vörumerki, mun loka dyrum sínum 1. febrúar næstkomandi. Þetta kemur fram í umfjöllun Morgunblaðsins.

Heilsuhúsið á sér langa sögu hér á landi og hefur í áratugi verið eitt helsta kennileiti heilsuvöruverslana á höfuðborgarsvæðinu. Fyrsta verslunin var opnuð á Skólavörðustíg árið 1979 og síðar voru starfræktar fleiri verslanir víða um land. Lyfja keypti fyrirtækið árið 2005 og rak um tíma nokkur útibú, en Kringluverslunin var síðasta verslunin sem enn var opin.

Að sögn Karenar Óskar Gylfadóttur, framkvæmdastjóra Lyfju, liggja breyttar aðstæður á markaði að baki lokuninni. Heilsu- og lífrænar vörur séu nú mun aðgengilegri í almennum verslunum en áður, sem hafi aukið samkeppni og gert reksturinn erfiðari. Þrátt fyrir lokun verslunarinnar mun vörumerkið Heilsuhúsið áfram lifa á netinu og vörur verða áfram seldar í apótekum Lyfju.

Með lokuninni lýkur löngum kafla í sögu sérhæfðrar heilsuvöruverslunar á Íslandi.

Mynd: heilsuhusid.is