Egill Jacobsen hættir starfsemi um áramótin eftir aðeins tíu mánaða rekstur

Veitingastaðurinn Egill Jacobsen í Austurstræti, sem starfað hefur í rýminu sem áður hýsti Laundromat, hættir starfsemi um áramótin. Öllum 25 starfsmönnum staðarins var tilkynnt um lokunina um síðastliðin mánaðamót, um leið og þeir fengu uppsagnarbréf í hendurnar.

Jóhann Friðrik Haraldsson, eigandi staðarins, segir ákvörðunina að vonum þungbæra, tildrög hennar hafi verið áfall fyrir alla og að það séu mikil vonbrigði að þurfa að skella í lás aðeins tíu mánuðum eftir að Egill Jacobsen opnaði fyrst dyrnar.

Ástæðan hafi þó í raun verið einföld: Hækkandi kostnaður samhliða dræmari aðsókn en spár höfðu gert ráð fyrir gerðu reksturinn þungan, að því er fram kemur á visir.is sem fjallar nánar um málið hér.

Egill Jacobsen býður upp á fjölbreyttan matseðil þar sem áhersla er lögð á morgunverð, bröns og létta rétti að auki girnilegan kokteilseðil.

Mynd: facebook / Egill Jacobsen