Vel gengur við Pollinn

Halldór og Eiríkur eru ánægðir með fyrstu vikurnar sem Við Pollinn hefur starfað.

Fyrstu vikurnar í rekstri veitingastaðarins Við Pollinn á Ísafirði hafa gengið vel og hlakka eigendurnir, þeir Halldór Karl Valsson og Eiríkur Gísli Johansson, til vetrarins. „Það var mikil vinna að taka við veitingastaðnum en það gekk þó vel,“ segir Halldór.

„Við erum nýbúnir að setja upp nýjan matseðil þar sem við tókum inn nokkrar nýjungar,“ segir Eiríkur í viðtali við Vestfirska fréttavefinn bb.is. „Meðal annars bjóðum við upp á þriggja rétta óvissuferð með kokkinum sem hefur verið sérstaklega vinsælt á veitingastöðum á suðvesturhorninu. Þá komum við viðskiptavinum á óvart með þriggja rétta máltíð og þremur vínglösum.“

Þeir Halldór og Eiríkur segjast þó hafa haldið í fáeina rétti af matseðli SKG sem hafi notið mikilla vinsælda auk þess sem áfram verður boðið upp á súpu og salatbar í hádeginu á virkum dögum. Piltarnir segjast einnig munu halda áfram einhverjum hefðum SKG, svo sem villibráðakvöldi, jólahlaðborði og skötuveislu á Þorláksmessu. „Okkur dettur heldur ekki í hug að hætta að vera með smørrebrød á aðventunni,“ segir Eiríkur. Ekki verður aðeins haldið í hefðirnar heldur einnig bryddað upp á nýjungum, en þeir félagar áætla að halda konukvöld í október í tengslum við hátíðina Veturnætur. „Við ætlum að prufa okkur áfram og sjá hvaða réttir og viðburðir fara vel í fólk,“ segir Eiríkur.

Mynd: bb.is | [email protected]