Göngur og réttir | Sveitamenningin blómstrar

Göngur eða smölun fjár af afréttum og í framhaldi réttirnar sjálfar eru órjúfanlegur partur af íslenskri menningu og um leið mikilvægur félagslegur þáttur í lífi bænda.

Í réttum hjálpast bændur og búalið við að draga féð úr almenningi og flokka eftir bæjum. Fénu er komið þannig til skila til sinna eigenda. Réttir eru líka gríðarlega vinsælar hjá þéttbýlisbúum sem fjölmenna til að taka þátt og fá þannig tengingu við sveitina og söguna sem við deilum öll saman.

Lengstu göngur landsins taka 9 daga þar sem hluti bænda á Suðurlandi fara á hestum langt inn á hálendið allt upp að jökulrótum Hofsjökuls. Hver hópur gangnamanna sem kenndur er við sína sveit á sér síðan leiðtoga og verkstjóra sem kallast ýmist Fjallkóngur eða Fjalldrottning eftir því sem við á.