Viltu hafa áhrif á spennandi nýjungum í Hörpu? – Bergmál bistro hættir

Sláum nýjan tón í Hörpu

Fyrir rúmlega ári síðan opnaði nýr veitingastaður í Hörpu sem fékk nafnið Bergmál bistro og tók þar með við Smurstöðinni á fyrstu hæð Hörpunnar. Bergmál bistro hætti allri starfsemi nú á dögunum.

Sjá einnig:

Smurstöðin hættir og nýr veitingastaður tekur við

Nú er auglýst eftir áhugasömum rekstraraðilum og hugmyndum einstaklinga að spennandi nýjungum í Hörpu með nýju slagorði: Sláum nýjan tón í Hörpu.

Harpa fagnar 10 ára afmæli á næsta ári. Af því tilefni ætla forsvarsmenn Hörpunnar að slá nýjan og ferskan tón. Markmiðið er að nýtt skipulag veitingastaða, verslana og annarrar þjónustu endurspegli sérstöðu Hörpu, í takti við breytt landslag og nánasta umhverfi í miðborg Reykjavíkur.

Harpa er einn fjölsóttasti áfangastaður Reykjavíkur, miðstöð mannlífs og menningar þar sem um 1.200 viðburðir eru haldnir á ári.

Starfsemin í Hörpu

Starfsemin í Hörpu er bæði kraftmikil og fjölbreytt.

Á liðnu ári voru tónleikar og listviðburðir alls um 425, ríflega 400 ráðstefnur, fundir og tengdir viðburðir voru haldnir, og listviðburðum fyrir ferðamenn fjölgaði mikið á milli ára. Þá var Sinfóníuhljómsveit Íslands með 108 tónleika og er lang stærsti einstaki viðburðarhaldarinn í húsinu. Íslenska óperan, sem einnig á sitt fasta aðsetur í Hörpu, var með 16 viðburði.

Viðburðir fyrir börn og fjölskyldur voru alls 144 sem er tvöföldun á milli ára.

Skilafrestur

7. október
Skilafrestur veitingaþjónustu.

19. október
Skilafrestur verslunar, þjónustu og upplifunar.

Tímarammi verkefnis er út árið 2021.

Frekari fyrirspurnir á nyrtonn@harpa.is

Mynd: úr safni