Sticks’n’Sushi fór yfir 18 milljarða króna í veltu

Mynd: sticksnsushi.com

Dansk-japanska veitingahúsakeðjan Sticks’n’Sushi lýsir árinu 2025 sem tímamótaári eftir að velta félagsins fór í fyrsta sinn yfir 100 milljónir breskra punda, eða sem nemur rúmlega 18 milljörðum íslenskra króna.

Fyrirtækið, sem rekur 32 veitingastaði í Danmörku, Bretlandi og Þýskalandi, velti um 18,8 milljörðum króna á árinu 2025, sem er um 6% aukning frá fyrra ári. Rekstrarhagnaður fyrir afskriftir og fjármagnsliði (EBITDA) nam um 1,5 milljörðum króna.

Stærsti dagur í sögu fyrirtækisins var gamlársdagur 2025 þegar dagsveltan fór í fyrsta sinn yfir 180 milljónir króna.

Á árinu opnaði Sticks’n’Sushi sinn 31. veitingastað í Glasgow, þann fyrsta utan Suðaustur-Englands. Á þessu ári hefur fyrirtækið haldið áfram sókn sinni með opnun nýs staðar í Manchester og stefnir jafnframt að fyrstu opnun sinni í Prag síðar á árinu. Þá eru Birmingham og Leeds nefndar sem næstu áfangastaðir í Bretlandi.

Andreas Karlsson, forstjóri Sticks’n’Sushi, segir að árangurinn endurspegli sterkan rekstur og gefi fyrirtækinu aukið sjálfstraust til áframhaldandi uppbyggingar. Hann segir jafnframt að góðar viðtökur í Glasgow og Manchester staðfesti að vaxtarstefnan sé á réttri leið.

Sticks’n’Sushi var stofnað í Kaupmannahöfn árið 1994 og hefur starfað á breskum markaði frá árinu 2012.

Tengt efni:

Danska veitingahúsakeðjan Sticks ‘n’ Sushi ánægð með Bretlandsmarkað eftir metár