Rjómabúið Erpsstaðir opnar skyrsýningu og skyrbar

Rjómabúið Erpsstaðir.
Mynd: facebook / Rjómabúið Erpsstaðir

Rjómabúið Erpsstaðir hefur nú í nokkur ár framleitt skyr upp á gamla mátann, kynnt framleiðsluaðferðina og sagt ferðamönnum sögu skyrsins. Núna er verið að leggja lokahönd á uppsetningu á sögusýningu, fræðslusetri og smakkbar á hinu hefðbundna íslenska skyri og verður formleg opnun 8. apríl.

Verkefnið hefur verið unnið í samstarfi við Matís út frá hugmyndafræði ÉCONOMUSÉE® samtakanna, svokallaðra hagleikssmiðja.

Rjómabúið Erpsstaðir opnar skyrsýningu og skyrbar.
Mynd: matis.is

Í fréttatilkynningu frá Matís kemur fram að hönnuðurinn Guðfinna Mjöll Magnúsdóttir er listrænn stjórnandi verkefnisins og fékk hún myndlistarmanninn Auði Lóu Guðnadóttur til liðs við sig við uppsetningu sýningarinnar.

Viðurkenning á gæðum og þekkingu

Við opnunina gengur Rjómabúið Erpsstaðir inn í alþjóðlegu samtökin ÉCONOMUSÉE® network. ÉCONOMUSÉE® network eru samtök handverksfyrirtækja sem viðurkennd eru fyrir gæði sín og sérstöðu, og opna dyr sínar fyrir almenningi til að deila ástríðu sinni á viðfangsefni sínu og arfleifð.

Um 80 handverksfyrirtæki í átta löndum eru nú aðilar að samtökunum. Á Íslandi höfum við kallað slík fyrirtæki hagleikssmiðjur og eru þjár aðrar fyrir hér á Íslandi:

• Sútunarverksmiðjan Gestastofa Sútarans á Sauðárkróki
• Leir 7, leirverkstæði
• Smávinir tréskurður í Stykkishólmi

Markmið ÉCONOMUSÉE® Network er að halda í heiðri handverki og handverksþekkingu samhliða því að tryggja hagvöxt í dreifbýli.

Matís er fulltrúi ÉCONOMUSÉE® network á Íslandi. Verið velkomin á opnunarhátíð á Rjómabúinu Erpsstöðum þann 8. apríl frá kl. 13-17 og takið þátt í gleðinni.