Páskaegg fyrir sanna sælkera – Handgerð páskaegg

Það styttist í sölu á handgerðu páskaeggjunum hjá frönsku kökuversluninni Sweet Aurora, en salan hefst 15. mars. næstkomandi.

„Þetta er í fyrsta skipti sem við gerum þessi súkkulaðiegg og eru páskaeggin handgerð og hönnuð af ástúð og natni,“

sagði Aurore Pélier Cady eigandi Sweet Aurora í samtali við veitingageirinn.is.

Páskaeggið kostar 5.500 kr. og er mælt með því að panta fyrir fram, en allar upplýsingar um páskaeggin er hægt að nálgast á vef verslunarinnar hér.

Kökuverslunin Sweet Aurora

Kökuverslunin Sweet Aurora er staðsett í kjallarahúsnæði við Bergstaðastræti 14 í Reykjavík.

Um Aurore Pélier

Aurore Pélier Cady

Aurore Pélier Cady er franskur pastry chef, en hún lærði fræðin sín í heimsþekkta skólanum Institut Paul Bocuse og starfaði í meira en áratug á flottum hótelum og veitingastöðum í París, á borð við Hotel George V eða KL Patisserie svo fátt eitt sé nefnt.

Árið 2019 ákvað Aurore að flytja til Íslands, en hún hefur t.a.m. starfað hjá Slippnum í Vestmannaeyjum, Vox á Hilton hótelinu, íslenska Michelin veitingastaðnum Dill, en Gísli Matt og Gunni Kalli kenndu Aurore meðal annars allt um íslenskar jurtir og hvernig á að nota þær í matargerð.

Meðfylgjandi myndir tók franski ljósmyndarinn Kevin Pages.