New York Times fjallar um íslensku pylsuna sem þjóðarrétt

Bæjarins Beztu pylsur á Keflavíkurflugvelli, þar sem íslenska pylsan tekur á móti ferðalöngum við komuna til landsins.
Mynd: isavia.is

Bandaríska dagblaðið The New York Times beinir sjónum sínum að íslenskri matarhefð í nýlegri umfjöllun þar sem pylsan fær óvænt hlutverk sem eins konar þjóðarréttur. Greinin hefst á einfaldri staðhæfingu um veruleika margra ferðamanna og heimamanna. Ísland sé dýr áfangastaður þegar kemur að mat, þar sem landið reiðir sig að stórum hluta á innflutt hráefni og verðbólga hefur verið þrálát þrátt fyrir aðgerðir stjórnvalda.

Þrátt fyrir hátt verðlag segir blaðið að eitt standi eftir sem aðgengilegur kostur fyrir flesta. Pylsan. „Allir borða hana, ríkir sem fátækir,“ er haft eftir Gabriel Mána De Sousa, sextán ára starfsmanni á pylsuvagni sunnan Reykjavíkur. Þar lýsir hann klassískri pöntun, „ein með öllu“, með hráum og steiktum lauk, sinnepi, tómatsósu og remúlaði. Pylsurnar sjálfar eru gjarnan úr blöndu af íslensku lambakjöti og nautakjöti ásamt innfluttu svínakjöti, sem skilar sér í einkennandi áferð og bragði sem vekur athygli blaðamanns.

Bæjarins Beztu Pylsur á Hellu, þar sem klassíska „ein með öllu“ er aldrei langt undan.
Mynd: Bæjarins Beztu Pylsur 

Í umfjölluninni er pylsan sett í samhengi við aðra borgarmenningu og borin saman við svokallaða dollar sneið í New York. Einfaldur, heitur og áreiðanlegur réttur sem er betri en búast mætti við miðað við verð.

En jafnvel þessi þjóðlegi skyndibiti sleppur ekki undan verðþróun síðustu ára. Algengt verð fyrir pylsu í dag er um 750 krónur, sem þykir lágt í samanburði við annað skyndibitaúrval á höfuðborgarsvæðinu. Þar getur kebab farið upp í um 17 dali og pizza í um 20 dali. Samkvæmt tölum sem vísað er til í greininni hefur verðlag hækkað um 5,2 prósent á milli ára, sem er umtalsvert meira en meðaltal í Evrópusambandinu.

Bæjarins Beztu Pylsur við Tryggvagötu árið 2014, einn þekktasti pylsuvagn landsins í hjarta Reykjavíkur.
Mynd: Smári / Veitingageirinn.is

Sérstaklega er fjallað um Bæjarins Beztu Pylsur, sem er líklega þekktasti pylsustaður landsins. Fyrirtækið hefur starfað frá því á fjórða áratug síðustu aldar og hefur á undanförnum árum stækkað hratt, úr fjórum sölustöðum í fjórtán. Framkvæmdastjórinn Baldur Ingi Halldórsson segir verðhækkanir síðustu ára meiri en hann hafi séð á tveimur áratugum. Árið 2022 kostaði pylsa um 600 krónur en er nú komin í 880 krónur, sem endurspeglar bæði hækkandi hráefniskostnað og laun.

Umfjöllunin dregur þannig upp mynd af íslenskum veruleika þar sem verðlag hefur hækkað víða, en pylsan heldur samt stöðu sinni. Hún er einföld, aðgengileg og djúpt rótgróin í daglegu lífi landsmanna.

Hægt er að lesa alla umfjöllunina með því að smella hér.