Michelin strákarnir með snilldar uppskrift af bleikjutartar

Bleikjutartar

Barði Páll Júlíusson og Víðir Erlingsson matreiðslumenn standa nú í stórræðum, en þeir réðu sig til starfa á veitingastaðinn Koks í Færeyjum.

Sjá einnig: Barði og Víðir hefja störf á Michelin staðnum Koks í Færeyjum

Þeir félagar flugu til Færeyjar í lok febrúar og þá tók við undirbúningur fyrir opnum staðarins en hann opnaði 19. mars s.l.  Koks er með 2 Michelin stjörnur.

Víðir Erlingsson og Barði Páll Júlíusson

Barði og Víðir deila hér girnilegri uppskrift af bleikutartar, en þessi réttur var hannaður út frá innblæstri frá Koks:

Bleikjutartar

1 bleikjuflak
Salt
Sítrónusafi
Ólífuolía

Aðferð:
Bleikjan er roðflett, fituhreinsuð og skorin í litla teninga og söltuð (miðið við 15 g af salti á móti 500 g af bleikju).

Bleikjan er látin liggja í saltinu í 1 klst. en er síðan skoluð og þerruð.

Smakkið hana til með ólífuolíu og sítrónusafa.

Dillsósa

150 g ferskt dill
50 g spínat
40 g eplaedik
20 g Dijon-sinnep
50 g vatn
130 g olía
1 g salt

Aðferð:
Setjið allt hráefni í blandara nema olíuna og vinnið vel saman. Olíunni er síðan bætt varlega út í og leyft að vinna vel saman þangað til sósan hefur náð góðri áferð.

Skyr

300 g skyr
15 g grófkorna sinnep
2 g salt
20 g hrásykur
½ stk. sítróna
7,5 g piparrót

Aðferð:
Allt hráefni setti í blandara og unnið saman.

Bankabygg

Byggið er soðið í vatni og sigtað þegar tilbúið. Látið inn í ofn í 3-5 klst. á 60°C og látið þurrkast.

Næst er það djúpsteikt í 200°C heitri olíu og þegar það byrjar að fljóta er það klárt. Sett á pappír til að leyfa olíunni að leka af og saltað.

Í lokin eru litlum gúrkukúlum bætt við ásamt fersku dilli og vatnakarsa.