Jógúrtkaka með hvítu súkkulaði

Dásamlega létt og einföld kaka sem hentar vel sem eftirréttur eða bara þegar manni langar. Stærðin á kökunni er ótrúlega hentug en úr henni fást 6-8 sneiðar. Ekki of stór, ekki of lítil!

Botn

200 g graham kex

100 g smjör

1 dl ristaður kókos

Fylling

250 ml rjómi

350 g grísk jógúrt

2 msk flórsykur

100 g hvítt súkkulaði

Setjið kexið í matvinnsluvél, myljið og setjið í skál. Setjið kókosinn í matvinnsluvél ef þið eruð með flögur annars bætið þið beint saman við kexmulninginn. Bræðið smjörið og blandið vel saman við kexið og kókosinn.

Takið 18 cm form, gott að setja bökunarpappír eða plastfilmu í botninn og setjið blönduna í botninn og þrýstið vel niður og með fram hliðum. Kælið í ísskáp meðan fyllingin er gerð.

Þeytið rjómann í einni skál, blandið saman grískri jógúrt og flórsykri í annarri og bræðið hvítt súkkulaði inn í örbylgju í þeirri þriðju.

Blandið þá saman þeytta rjómanum saman við grísku jógúrtina með sleikju. Hrærið í súkkulaðinu og passið að það sé allt bráðið, þá er gott að taka smá skammt af grísku jógúrtinni og rjómanum og blanda saman við súkkulaðið og bætið saman við í smá skömmtum þar sem súkkulaðið er heitt og blandan er köld. Blandið síðan öllu saman og hrærið vel. Hellið þá fyllingunni yfir kexbotninn og kælið í 3-4 klst minnst.

Auglýsingapláss

Takið kökuna varlega úr forminu og dreifið hindberjum eða jarðaberjum yfir. Þá er bara að bera hana fram!