Íslenskir ástarpungar í eigu Norðmanna

Gæðabakstur framleiðir ekki þessa ástarpunga. Það er Public House sem á veg og vanda að þessari uppskrift, hægeldaður Lambaskanki í ástarpungi.

Norska fyrirtækjasamsteypan Orkla Group er orðin stórtæk á íslenskum matvælamarkaði. Samsteypan framleiðir m.a. ástarpunga.

Í upphafi þessa mánaðar var greint frá því að félagið Gæðabakstur ehf. hefði keypt meirihluta í Brauðgerð Kr. Jónssonar & Co, einnig þekkt sem Kristjánsbakarí. Kristjánsbakarí er í hópi elstu fyrirtækja landsins og hafði fram að kaupunum verið fjölskyldufyrirtæki í samfelldri eigu þriggja ættliða í 103 ár frá stofnun.

Með kaupunum færðist Kristjánsbakarí inn í norsku samsteypuna Orkla Group A/S, sem er skráð í norsku kauphöllina. Orkla Group er í hópi stærstu fyrirtækja í Noregi, en um 13.000 starfsmenn störfuðu fyrir félagið í lok síðasta árs. Samstæðan er metin á jafnvirði 984 milljarða íslenskra króna í norsku kauphöllinni. Til samanburðar eru öll félögin í íslensku úrvalsvísitölunni metin á 565 milljarða króna, að því er fram kemur á vef Viðskiptablaðsins.

Eitt af dótturfélögum Orkla Group er danski smjörlíkisframleiðandinn Dragsbæk margarinfabrik A/S. Í eigu þess er svo félagið Blume Foods I/S, sem aftur á allt hlutafé í íslenska félaginu Viska hf.

Nánar er fjallað um málið í Viðskiptablaðinu í dag.

Mynd: Smári