Guðmundur og Svala hrepptu titilinn Íslandsmeistarar í brauðtertugerð

Tilkynnt var um verðlaunahafana á Íslandsmeistaramótinu í brauðtertugerð í útgáfuboði Stóru brauðtertubókarinnar í dag, en dagur íslensku brauðtertunnar er einmitt haldinn hátíðlegur í dag, miðvikudaginn 13. nóv.

Stóra brauðtertubókin er nýkomin úr prentun og eftirvæntingin hjá bókaunnendum og er henni dreift í verslanir um land allt. Í bókinni er að finna brauðtertur úr ýmsum áttum ásamt nytsamlegum fróðleik og allskonar skemmtilegheitum.

Það komu fjölmargar uppskriftir inn í keppnina og ekki auðvelt verk að skera úr um hvaða tertur skyldu hreppa hnossið.

En hér koma verðlaunahafarnir:

Fallegasta brauðtertan: Steinunn Erla Sigurgeirsdóttir fyrir himneska hangikjötstertu.

Frumlegasta brauðtertan: Berglind Ellý Jónsdóttir fyrir róttæka rækju og Ritz-kex tertu.

Bragðbesta brauðtertan: Magnús Ingi Björgvinsson fyrir ljúffenga rækjutertu.

Besta pörunin; brauðterta+kampavín: Ingimar Flóvent Marínósson fyrir túnfisktertu.

Og loks er það Íslandsmeistarinn í brauðtertugerð, það eru þau Guðmundur Kristinsson og tengdamóðir hans Svala Sveinbergsdóttir sem gerðu dásamlega fallega, bragðgóða og haganlega skreytta rækjutertu.

Terturnar er svo allar að finna í Stóru brauðtertubókinni.

Myndir: aðsendar / Karl Petersson