Friðheimar opna glæsilega vínstofu – Myndir

Nýverið opnuðu Friðheimar vín- og vinnustofu sem gengur undir nafninu Vínstofa Friðheima.

Hún er staðsett í gömlu gróðurhúsi frá árinu 1976 sem skartar 50 ára gamalli vínberjaplöntu sem setur fallega sál í húsið.

Vínstofan leggur áherslu á breitt úrval af fallegum og góðum hanastélum, bjórum og gæðavínum, en vínseðillinn er nú þegar orðinn 17 blaðsíður og fer stækkandi, svo allir ættu að finna eitthvað við sitt hæfi.

Vínstofan býður einnig upp á nokkra létta rétti á matseðli sem passa einstaklega með vínum, þar má t.a.m. nefna bruschettur, antipasti, ostabakka og bakaðan ost.

Þar er tilvalið að setjast niður í drykk og mat, spjalla og njóta í góðra vina hópi eða glugga í bók eða vinna. Vínstofan býr yfir þremur fullbúnum fundarherbergum sem bjóða upp á möguleika á alls kyns fundarhöldum, námskeiðum eða vinnustofum.

Jón K.B. Sigfússon matreiðslumeistari Friðheima

Síðar á árinu stendur til að flétta inn matar- og vínupplifun með sögustund sem hentar vel fyrir litla hópa og einstaklinga. Að lokum er Vínstofa Friðheima hinn fullkomni staður fyrir alls kyns viðburði, tónleika, brúðkaup, uppistand o.s.frv.

Vínstofan er opin alla daga frá kl. 13:00-22:00 og eru allir hjartanlega velkomnir

Að því tilefni látum við fylgja hér með myndir frá opnunardeginum.

Myndir: aðsendar