Eitt kg af heimsins dýrasta marmelaði kostar um 660.000 krónur

Breska fyrirtækið Duerr segist hafa framleitt dýrasta marmelaði heims, en skammtur á eina brauðsneið mun kosta 76 pund, um 10.000 krónur. Kílógrammið af marmelaðinu kostar 5.000 pund, um 660.000 krónur.

62 ára gamalt Dalmore maltviskí var notað til marmelaðigerðarinnar, Pol Roger eðalkampavín og ætt blaðgull.

Marmelaði það er Bretar borða helst er framleitt úr súrum appelsínum og þykir ómissandi hluti ensks morgunverðar. Í enskum morgunverði má finna steikt flesk, egg, pylsur, ristað brauð með marmelaði, steiktar tómatsneiðar og sveppi, stundum kartöfluteninga og bakaðar baunir.

Duerr bjó til marmelaðið dýra í tilefni af 125 ára afmæli fyrirtækisins. Krukka með einu kg af lostætinu verður seld á uppboðsvefnum eBay síðar á árinu og rennur ágóðinn til góðgerðarmála.

Greint frá á Mbl.is

[email protected]