Dýrindis jólahlaðborð á veitingastaðnum Sunnu á Sigló – Veitingarýni

Veitingastaðurinn Sunna á Hótel Sigló býður upp á glæsilegt jólahlaðborð í aðdraganda jóla nú sem endranær. Jólahlaðborðið sem hófst 15. nóvember s.l. verður alla föstudaga og laugardaga til 14. desember.

Mjög jólalegt var á staðnum sem var smekklega skreyttur. Tekið var vel á móti okkur með brosi og þægilegu viðmóti.

Hitti gamlan starfsfélaga, franska kokkinn Emmanuel Bodinaud sem ég starfaði með á Hótel Loftleiðum fyrir 100 árum. Emmanuel starfar nú á veitingastaðnum Sunnu á Sigló. Virkilega gaman að hitta hann og rifja upp gamla daga.

Emmanuel Bodinaud

Gott úrval af forréttum, reykta og grafna gæsin alveg einstaklega góð og hreindýrapaté var mjög gott og villibragðið kom vel í gegn. Með þessu var borin fram klassísk Cumberland sósa og koníaks og rúsínusósa sem passaði einstaklega vel með.  Rúgbrauð, laufabrauð og heimabakað brauð.

Tvíreykt hangilæri frá Ólafsfirði

Hrátt tvíreykt hangilæri var á boðstólnum sem matreiðslumeistari staðarins skar niður fyrir fram gesti. Þvílíkt sælgæti.

Grafinn lax klikkar ekki ef uppskriftin og aðferðin er rétt og reykti laxinn góður og það var allt upp á tíu hér, mjög gott.

6 tegundir af síld og síldaréttirnir hver öðrum betri með sænsku ívafi, appelsínu og stjörnuanís síld, sólberjasíld, hvítlaukssíld og að sjálfsögðu jólasíldin.

Kalt tvíreykt soðið hangikjöt og hamborgarhryggur, og á steikarhlaðborðinu var purusteikin með vel stökkri puru, kalkúnabringa og dúnmjúkt lambalæri og kokkarnir á Sunnu eru greinilega vel að sér í steikingu en þetta var ein besta lambasteik sem ég hef smakkað, algjört sælgæti. Alls kyns meðlæti var í boði með aðalréttunum.

Svo kom punkturinn yfir i-ið, EFTIRRÉTTIRNIR, girnilegir og mjög góðir, hvít súkkulaðimús með ristuðum kókosflögum, hindberjamús, konfekt, frönsk súkkulaðikaka að sjálfsögðu. Pavlova með berjablöndu, góð samsetning, létt og góð.

Á Crème Brûlée vantaði smá herslumun af stökku og karamellíseruðu skorpunni ofan á en annars virkilega gott.

Þjónustan var afskaplega góð og mikill metnaður lagður í allt sem borið var á borð.

Það eina sem ég get sett út á, ef þannig má orða, er að það mætti hugsa meira um að hreinsa leirtauið á borðinu á milli forrétta, aðalrétta og eftirrétta.

Yfir heildina var þetta virkilega gott og greinilega mikill metnaður lagður í jólahlaðborðið og þjónustu, en Sunna á Sigló fær klárlega okkar meðmæli, frábær staður.