Dunkin’ Donuts í Kringluna | Nýi staðurinn verður með sætisaðstöðu fyrir allt að 30 manns

Árni Pétur Jónsson, forstjóri Dunkin´ Donuts á Íslandi og Sigurjón Örn Þórsson, framkvæmdastjóri Kringlunnar.

Kaffihúsakeðjan Dunkin´ Donuts opnar sitt annað kaffihús á Íslandi í október næstkomandi og verður það staðsett á fyrstu hæð í Kringlunni.  Árni Pétur Jónsson, forstjóri Dunkin´ Donuts á Íslandi, er ánægður með staðsetninguna og segir það eðlilega þróun mála að annað kaffihúsið hér á landi verði í verslunarmiðstöðinni.

Starfsfólk Dunkin´ Donuts á Laugavegi.

Viðskiptavinir Kringlunnar eru fjölmargir daglega og það er ánægjulegt að geta boðið þeim upp á frekara úrval af góðum veitingum á viðráðanlegu verði. Við verðum með hraða og góða þjónustu og sama vöruúrval og á kaffihúsinu okkar á Laugavegi. Því verður hægt að setjast niður í rólegheitunum eða grípa með sér til dæmis kjúklingavefju, beyglu með laxi og rjómaosti og svo að sjálfsögðu hágæða kaffi og kaffidrykki. Þeir sem eru í þeim gírnum að leyfa sér smá sætindi geta skellt sér á einn kleinuhring, nú eða kassa og leyft öðrum að njóta með sér,

segir Árni.

Beygla með Caprí salati og ískaffi.

Gert er ráð fyrir að ráða þurfi í kringum 10 manns fyrir opnunina og eftir að þeim ráðningum lýkur eru um 30 manns í vinnu hjá Dunkin´ Donuts á Íslandi. Árni Pétur segir að virkilega vel hafi tekist til í ráðningarmálunum til þessa og að mikill áhugi sé fyrir því að starfa á kaffihúsum keðjunnar, en til stendur að staðirnir verði orðnir 16 talsins eftir fimm ár.

Það er óhætt að segja að mikið hafi mætt á starfsfólkinu til þessa enda viðtökurnar við fyrsta staðnum á Laugavegi verið vonum framar. Við erum með harðduglegt fólk í vinnu, sem hefur fengið góða þjálfun en við trúum því að þjálfunin skili sér til viðskiptavina okkar með glaðlegri og öruggri þjónustu,

segir hann.

Latte og íslatte.

Yfir 180 verslanir, veitingastaðir og þjónustuaðilar eru í Kringlunni en verslunarmiðstöðin er sú stærsta í Reykjavík. Sigurjón Örn Þórsson, framkvæmdastjóri Kringlunnar, fagnar því að samningar hafi náðst um komu Dunkin´ Donuts þangað inn.

Við trúum því að þessi viðbót eigi eftir að leggjast vel í viðskiptavini okkar enda er Dunkin´ Donuts sterkt vörumerki sem virðist vera mikill áhugi fyrir hjá landsmönnum. Við viljum bjóða viðskiptavinum Kringlunnar upp á val þegar kemur að verslun, veitingum og þjónustu og þetta er einn liðurinn í því,

segir Sigurjón.

Myndir: Aðsendar