Café París lokar og Duck & Rose tekur við

Eitt vinsælasta útisvæði á veitingahúsum borgarinnar er við veitingastaðinn

Duck & Rose er nýr veitingastaður í miðbæ Reykjavíkur sem opnar í lok maí.

Á Duck & Rose verður lagt áhersla á létta og heiðarlega matreiðslu með áhrifum frá Frakklandi og Ítalíu.  Duck & Rose er staðsettur á einu flottasta horni Reykjavíkur, við Austurvöll á horni Pósthússtræti og Austurstrætis þar sem Café París var áður til húsa.

Eyþór Mar: „ég ákvað að fjárfesta ásamt flottu fólki í nýjum veitingastað“

„Það er venjulega talað um að maður eigi að fjárfesta í sjálfum sér í kreppu. Ég held að ég hafi misskilið eitthvað því ég ákvað að fjárfesta ásamt flottu fólki í nýjum veitingastað. Hef mikið verið að vinna með 1 veitingastaður á ári þannig að 2020 verður ekkert öðruvísi.

Við keyptum Café Paris sem er án efa eitt flottasta horn Reykjavíkur. Glæsilegt útisvæði, frábær staðsetning og síðan er húsnæðið sjálft mjög skemmtilegt og býður upp á fjölda möguleika. Við ákváðum þó að breyta um concept og nafn.

Duck & Rose varð fyrir valinu og mun opna í lok maí. Á Duck & Rose munum við einblína á létta matreiðslu með áhrifum frá Frakklandi og Ítalíu. Einnig munum við hafa opið til 02:00 um helgar þegar það verður leyft aftur. Á næturna verður þægileg stemmning með kokteilum og kampavíni í fyrirrúmi.“

Frá þessu greinir Eyþór á Facebook-síðu sinni. Eigendur eru Eyþór Mar Halldórsson matreiðslumeistari og eigandi Public House – Gastropub, Róbert Ólafsson á Forréttabarnum, Ari Thorlacius og Einar Valur Þorvarðarsson framreiðslumenn, en Ari og Einar koma til með að sjá um rekstur Duck & Rose.

Yfirkokkur Duck & Rose er Margrét Ríkharðsdóttir

„Í dag eru einnig góðir tímar en ég hef tekið við sem yfirkokkur á nýjum stað Duck & Rose. Staðurinn mun opna þar sem Cafe París var staðsett. Ég er mjög spennt fyrir nýjum stað, verkefnum og samstarfsfélögum. Ég hlakka líka mikið til þess að taka á móti ykkur öllum, mínu besta fólki, á nýjum stað að loknu samkomubanni. Sjáumst með hækkandi sól“

skrifar Margrét á Facebook-síðu sinni, en hún var áður yfirkokkur á Bryggjunni Brugghús.

Mynd: Ólafur Sveinn Guðmundsson