Brasa tók á móti fyrstu gestum á glæsilegu jólahlaðborði – Myndir

Veitingastaðurinn Brasa á annarri hæð í Turninum við Smáratorg í Kópavogi bauð upp á sitt fyrsta jólahlaðborð síðastliðna viku. Að baki staðnum standa Hinrik Örn Lárusson, Viktor Örn Andrésson og Sigurður Helgason, allir margverðlaunaðir matreiðslumenn.

Sjá einnig: Nýr veitingastaður á Smáratorgi: Brasa kveikir eld í Turninum

Jólahlaðborðið verður í boði nú um helgina 21. og 22. nóvember, og daginn eftir, 23. nóvember, býður Brasa upp á hátíðlegan jólabrunch. Bæði hlaðborðið og brunchinn verða síðan fastir liðir um helgar til jóla.

Gestum stendur til boða einstaklega fjölbreytt og vandað jólahlaðborð þar sem saman koma klassískir réttir með nútímalegri og hugmyndaríkri útfærslu. Á borðum má finna stórglæsilegt úrval sjávarrétta, forrétta, vel útbúna aðalrétti og ríkulegt eftirréttahlaðborð.

Meðal þess sem boðið er upp á eru síldarréttir Brasa, laxa tiradito og grafinn lax, sushi-platti, carpaccio, dádýra tataki og innbakað hreindýrapaté, ásamt fjölbreyttum meðlætum og úrvali af sósum.

Aðalréttir hlaðborðsins eru meðal annars stökk purusteik í 5 spice, kolagrillað rib eye, kalkúnn af rotisserie og hangikjöt með uppstúf, en eftirréttahlaðborðið er í höndum konditormeistara Brasa þar sem allir ættu að finna eitthvað við sitt hæfi.

Jólabrunchinn er ekki síðri og býður meðal annars upp á Egg Benedict „Brasa Style“, klassískan brunchrétti, kalkún, purusteik, hangikjöt, fjölbreytt salöt, sósur og eftirrétti sem gleðja bæði börn og fullorðna. Á matseðlinum má einnig finna barnvæna rétti eins og kjúklinganagga, ostasamloku og ávexti.

Formleg opnun Brasa fer fram 26. nóvember þegar boðið verður upp á sérréttaseðil í fyrsta sinn. Veitingageirinn.is mun fylgjast náið með og fjalla nánar um opnunina.

Borðabókanir hér.

Myndir: aðsendar