Enn hefur ekki tekist að selja Gamla bakaríið á Ísafirði – Árni bakari alls ekki hættur

Árni Aðalbjarnarson.
Mynd: skjáskot úr myndbandi

Gamla bakaríið á Ísafirði var sett á sölu fyrir rúmu ári og enn hefur ekki tekist að selja, en Árni Aðalbjarnarson eigandi og bakari hefur þrátt fyrir það ekki tekist að slíta sig frá starfi sínu.

Gamla bakaríið var stofnað árið 1871 en hefur verið í eigu fjölskyldu Árna Aðalbjarnarsonar bakara síðan 1920, í heila öld. Hann hóf störf í bakaríinu við hlið foreldra sinna árið 1969 – og er raunar alls ekki hættur, að því er fram kemur í fréttum á Stöð 2 í vikunni.

Gamla bakaríið á Ísafirði.
Mynd: facebook / Gamla bakaríið

Þegar fréttastofa Stöðvar 2 hitti Árna á efri hæð myrkvaðs bakarísins var hann með ilmandi kringlur í ofninum, sem sendar eru til sölu í stórmörkuðum í bænum. Árni kveðst núorðið taka sér frí á sunnudögum en halda sér við efnið hina dagana.

„Það gekk svolítið illa hjá mér í byrjun að sofa út, svo ég læddist út eina nóttina og hérna niður í bakarí og bakaði eitthvað smávegis svo hefur það undið upp á sig,“ segir Árni.

Húsnæði bakarísins er til sölu eins og það leggur sig. Árni segir áhugasama kaupendur hafa haft samband en ekkert bitastætt sé þó í hendi.

„Mér finnst alveg ómögulegt að hætta að baka hérna í Gamla bakaríinu svo ég bíð bara eftir þvi að það komi hérna ungur maður og kaupi bakaríið og haldi þessu áfram.

Við vonum að Ísfirðingar fái gamla bakaríið sitt aftur.“

Horfa má á heimsókn fréttastofu Stöðvar 2 í Gamla bakaríið í spilaranum hér fyrir neðan.

Myndir: facebook / Gamla bakaríið